छम्ह भाग्यमानी !

थ्व संसारय् अजू चायापुगु घटना अले उकिया पात्रया ल्याखय् नं छुं कमि मदु । विश्वन्यंकं स्वयेगु खत धाःसा १ सेकेन्डय् सलंसः, द्वलंद्वः मनूया ज्यान वनाच्वंगु दइ अले १ मिनेटय् लखौंया । कालगतिं जक मखु, सतक दुर्घटना, गोली काण्ड, आपराधिक गतिविधि, आपतकालीन अवस्था, प्राकृतिक प्रकोप आदि घटनाय् लानाः मनूतय् ज्यान वनी ।

यदि थज्याःगु हे घटनाय् लानाः अकल्पनीय रुपं सुं म्वाना वल धाःसा वं यमराजयात अर्थात कालयात त्याका वःगु धाइ । थज्याःगु घटना बाहेकं निमेष भरय् लखौंया ज्यान काइगु परमाणु आक्रमण अझ व स्वयां भयावह जुइ । परमाणु बमया आविष्कार मानव सभ्यताया निंतिं हे दकलय् घातक खः ।

झी सकसिनं सिउगु हे खँ खः कि निक्वःगु विश्वयुद्धया इलय् अमेरिकां जापानय् निगः परमाणु बम आक्रमण याःगु खः । गुकी द्वलंद्वःया ल्याखय् मनूतय् ज्यान वन । थ्व आक्रमणं म्वनाच्वंपिनिगु जीवन नं सहज मजू । तर अजू चायापुगु घटनाया कमि मजूगु थ्व संसारय् अज्याःपिं नं मनू दु, गुपिं थुकथंया आक्रमणय् लानाः नं सकुशल पिहां वयेत सफल जुल ।

अमेरिकां प्रहार याःगु निगुलिं परमाणु बम आक्रमणय् लखौं मनूया ज्यान काःगु इलय् नं उगु आक्रमणं म्वाना वयेत सफल जूम्हमध्ये छम्ह खः सुतोमु यामागुची । सन् १९४५ य् निक्वःगु विश्वयुद्धया इलय् अमेरिकां जापानया निगू सहर हिरोशिमा व नागासाकिइ निगः परमाणु बम आक्रमण याःगु खः, व नं स्वन्हुया दुने ।

तर थ्व निगलं परमाणु आक्रमणपाखें यामागुची बचे जुयाः वयेत सफल जुल । विश्वयुद्धया इलय् अगष्ट ६ कुन्हु हिरोशिमाय् बम कुर्कूगु इलय् यामागुची अन हे दुगु खःसा अनं बचे जुयाः नागासाकी वंगु स्वन्हुया लिपा अन नं मेगु परमाणु बम आक्रमण याःगु खः । तर यामागुचीया अहोभाग्य धाये वा दैवी चमत्कार धाये व निगुलिं आक्रमणय् बचे जुइत सफल जुल ।

पेशां जलसैन्य इन्जिनियर यामागुची उगु इलय् २९ दँ जक दुगु खः, अले थःगु कम्पनीपाखें छुं ईया निंतिं व हिरोशिमाय् खटे जुयाच्वंम्ह खः । हिरोशिमाय् गुकुन्हु अमेरिकां आक्रमण याःगु खः, व हे न्हिकुन्हु यामागुची थःगु ज्या व कार्यकाल सिधयेकाः लिहां वयेत्यंम्ह खः ।
पासापिंलिसें बन्दरगाहपाखे लिहां वयेत वनाच्वंगु इलय् परमाणु आक्रमण जूगु खःसा उकी यामागुचीलिसें वया निम्ह पासापिं नं बचे जुइत सफल जुल ।

बल्लतल्लं थःगु गृहनगर थ्यंगु इलय् अन नं अमेरिकां परमाणु बम आक्रमण यात । झण्डै २ गू माइल तापाक प्रहार याःगु आक्रमणय् उकी नं बचे जुइत सफल यामागुची अन्ततः ९४ दँया उमेरय् सन् २०१० य् रेडियो विकीरणं जूगु क्यान्सरं मंत ।