देय् दबूया छेँ थ्व हे कार्यकालय् धस्वाःगु स्वये दयेमा

येँ(नेपालभाषा टाइम्स)- नेवाः देय् दबूया नीच्याक्वःगु बुसादँ वंगु ने.सं ११४२ यंलाथ्व सप्तमि (भदौ १८) गते हंगु दु । देय् दबूया बुसादँया लसताय् थीथी व्यक्ति, संघसंस्था व व्यवसाय याना वयाच्वंपिंत सिरपाः नं लःल्हाःगु खः ।

खुसिबुँइ च्वंगु विनायक मल्टी भेन्युइ देय् दबूया नायः पवित्र वज्राचार्यया सभापतित्वय् जूगु ज्याझ्वलय् वय्कलं हे लसकुस यानादीगु खः । देय् दबूया पुलांम्ह नायःलिसें संरक्षक, नेवाः न्ह्यलुवा मल्ल के. सुन्दरया प्रमुख आतिथ्यताय् जूगु ज्याझ्वलय् छगू लख तकाया थीथी स्वंगू सिरपाःलिसें थीथी व्यक्तित्वपिं हनेज्या नं याःगु खः ।

ज्याझ्वलय् नवासें मूपाहां मल्ल के. सुन्दरं देय्या थीथी आदिवासी जनजातित राई, लिम्बु, गुरुङ, मगः आदिया केन्द्रीय संगठन वा इमिगु केन्द्रीय ज्याकू स्वनिगलय् दइगु तर थनया आदिवासी व भूमिपुत्र धायेकाच्वनापिं झी नेवाःतय् राष्ट्रिय संगठनया केन्द्रीय ज्याकू धाःसा गन दु धकाः मालेमाःगु म्हाइपुगु व विडम्बनाया नं खँ खः धयादिल ।

लिसें वय्कलं आः देय् दबूया न्हूगु नेतृत्व वयेधुंकाः याकनं हे देय् दबूया थःगु हे केन्द्रीय भवन दइगु खँ वयाच्वंगु निश्चित रुपं थ्व झी सकसिगुं निंतिं लसता खँ खः धासें वर्तमान कार्यसमितिया कार्यकालय् हे देय् दबूया छेँ धस्वाःगु जक मखु उलेज्याझ्वलय् नं झी सकलें थथे हे मुने खन धाःसा थ्व थें लसतां जाःगु खँ मेगु छु जुइ धयादिल ।

देय् दबुलिं न्ह्यःने हःगु ‘झीगु भाय्, झीसं ल्हाये’ नाराय् जक सीमित मयासे देय्या कुंकुलामय् च्वंपिं सकलें नेवाःतय्त नेवाः भाय् ल्हाकेगु खःसा आः पुनःजागरण अभियान न्ह्याकेमाःगु हथाय् जुइधुंकूगु नं वय्कलं धयादिल ।

विशेष पाहां संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठं थौं झी सकलें थथे मुना च्वने खंगु व छगू थासं मेथाय् च्वंपिं नेवाःतय् दथुइ भाइचारा कायम यायेगु ज्याय् सुयां योगदान दुसा थौं स्वयां नीगुदँ न्ह्यः देय् दबूया परिकल्पना यानादीपिं व थुकियात नीस्वनेत न्ह्यचिलादीपिं हे खः धयादिल ।

लिसें वय्कलं देय् दबूया छेँ धस्वाकेत थम्हं फक्व ग्वाहालि यायेगु नापं माःथाय् तक ग्वाहालि कयाबीत न्ह्यचिलेगु प्रतिवद्धता नं प्वंकादिल ।
ज्याझ्वलय् नेवाः समाज, भाषा, कला, साहित्य, संस्कृति,सम्पदा संरक्षण, नेवाः अधिकार लगायतया ख्यलय् च्वछायेबहगु ज्या याना वयाच्वंगु खलः, पुचः व्यक्तियात बीगु ‘नारायणदेवी तीर्थ नेवाः समाज सेवा सिरपाः’ भाषासेवी गणेशराम लाछि (थिमि) व नेवाः मिसा पुचः (कास्की) यात लःल्हाःगु खः । थुगु सिरपाः छगू लख तका दांया खःसा वय्कःपिंत न्यय्द्वः, न्यय्द्वः तका दां लःल्हाःगु खः ।

अथे हे परम्परागत नेवाः व्यवसाय, आधुनिक व्यवसाय, न्ह्याका वयाच्वंगु व्यावसायिक संघसंस्था, कम्पनी, खलः, पुचः,गुथि उद्यमीयात बीगु ‘नारायणदेवी तीर्थ व्यवसायी प्रोत्साहन सिरपाः’ थुगुसी तोखा परम्परागत चाकु संरक्षण समाज (तोखा)यात लःल्हाःगु खःसा भाषा साहित्यया ख्यलय् च्वछायेबहगु योगदान बिया वयाच्वंगु खलः, पुचःलिसें व्यक्तियात बीगु छगू लख तका दांया गिरिधरलाल नेपालभाषा सेवा सिरपाः विराट नेपालभाषा साहित्य सम्मेलन गुथि (ख्वप) व नेवाः अमेरिकन दबू (शिकागो, अमेरिका)यात लःल्हाःगु खः । वय्कःपिंत नं न्यय्द्वः न्यय्द्वः तका दां लःल्हाःगु खः ।

नेवाः भाय् संस्कृति, कला, साहित्यया अन्तर्राष्ट्रिय ख्यलय् प्रचार प्रसार यायेगु ज्याय् ज्वःमदुगु योगदान याःगु नापं नेवाः भाय्यात गुगलय् दुथ्याकेत कुतः यानाच्वंगु हलिं नेवाः दबू (डब्लुएनओ)यात नं न्यय्द्वः तका दांलिसें विशेष सम्मान याःगु खः ।

ज्याझ्वलय् देय् दबूया सल्लाहकार लिसें संस्कृति, पर्यटन तथा नागरिक उड्डयन मन्त्री जीवनराम श्रेष्ठ, देय् दबूया सल्लाहकार राजेन्द्र मल्ल, नेपाल आदिवासी जनजाति महासंघया न्वकु युवराज जिरेलं भिंतुना लिसें नुगःखँ तयादीगु खः ।

देय् दबूया निवर्तमान कार्यसमितिया पदाधिकारी, दुजःलिसें सल्लाहकारपिंत नं सुभाय् पौ लःल्हाःगु ज्याझ्वलय् जुजुकाजी रंजित, रमना श्रेष्ठ, दीपा महर्जन, पवित्र कसां म्येँ न्यंकादीगु खःसा चचाप्याखंलिसें हुलाप्याखं नं न्ह्यब्वःगु खः ।