‘महानगरबारे भ्रमपूर्ण समाचार वयाच्वन’

येँ – येँ महानगरपालिकाया प्रमुख विद्यासुन्दर शाक्यं पत्रकारपिंसं समाचार च्वयाः नागरिकयात पाय्छिगु लँपुइ यंकेमाःगु खँ कनादीगु दु ।
नेवाः राष्ट्रिय पत्रकार दबूया स्वक्वःगु महाधिवेशनया उलेज्याझ्वलय् न्ववायेगु वय्कलं उगु खँ धयादीगु खः ।

पत्रकारया दायित्व सत्यतथ्य समाचार सम्प्रेषण यायेगु खँ धासें गुलिखे पत्रकारतय्सं गलत कथं समाचार च्वयाः समाजय् भ्रम न्यंकेगु ज्या जुयाच्वंगुलिं अज्याःगु प्रवृत्तिपाखें पत्रकार सचेत जुइमाः धयादिल । थ्व झ्वलय् वय्कलं येँ महानगरपालिकाया बारे आपालं भ्रमपूर्ण समाचार पिथनेगु यानाच्वंगु खँ नं धयादिल ।

पत्रकारपिंसं सत्यतथ्य समाचार मच्वल धाःसा देय् विकास व समृद्धिया लिच्वः लाइ धासें समन्वय व सहकार्य यायेमाःगु आवश्यकता दुगु खँ धयादिल । ज्याझ्वलय् प्रदेशसभा सांसद जीवन श्रेष्ठ, राजेश शाक्य, प्रेस काउन्सिल नेपालया अध्यक्ष किशोर श्रेष्ठ, नेपाल आदिवासी जनजाति पत्रकार महासंघया वरिष्ठ उपाध्यक्ष गजुुरधन राईपिंसं नं सम्बोधन यानादीगु खः ।

ज्याझ्वलय् थीथी व्यक्तिपिंत सिरपाः नं देछाःगु खः । राससया पत्रकार रत्नकृष्ण श्रेष्ठ, समाचारदाता याम प्रधान, अमृतलाल श्रेष्ठ, पत्रकार हिमेशरत्न वज्राचार्य व वरिष्ठ पत्रकार लिसें साहित्यकार मोहन दुवालयात सम्मान याःगु खः । ज्याझ्वलय् फोटो पत्रकार श्रेष्ठयात बाबुराजा ज्यापु फोटो पत्रकारिता पुरस्कार, पत्रकार अमृतलालयात ‘ज्ञानदेवी स्थापित स्मृति पत्रकारिता’ सिरपाः देछाःगु खः ।

थ्व निगुलं पुरस्कारया झिद्वः तकाया खः । उकथं हे साहित्यकार लिसे पत्रकार दुवालयात झिद्वः तकाया वाङ्मय शताब्दी पुरुष सत्यमोहन जोशी पत्रकारिता पुरस्कार व पत्रकार वज्राचार्ययात १११०० तकाया ‘भिक्षु कुमार काश्यप स्मृति पत्रकारिता सिरपाः बिउगु खः ।

उकथं हे याम प्रधानयात नीद्वः तकाया ‘ज्ञाननदेवी लक्ष्मीप्रभा स्मृति पत्रकार पुरस्कार’ सिरपाः बिउगु खः । दबूया नायः श्रीकृष्ण महर्जनया सभापतित्वय् न्ह्याःगु ज्याझ्वलय् वय्कलं सिरपाः कयादीपिं पत्रकारपिनिगु योगदानयात कयाः चर्चा
यानादीगु खः ।