त्रिपुरेश्वरय् अत्याधुनिक सार्वजनिक चःबि

येँ- येँ महानगर पालिकां त्रिपुरेश्वरय् अत्याधुनिक सार्वजनिक चःबि संचालनय् हःगु दु । येँ महानगरं ११ वडाया त्रिपुरेश्वरय् च्वंगु बस स्टेशनलिक्कं पुलांगु टिकट काउन्टर दुगु थासय् निर्माणयाःगु अत्याधुनिक चःबि संचालनय् हःगु खः ।

येँ महानगरं एरोशानलिसेया सहकार्यय् निर्माण याःगु आधुनिक चःबि निर्माणलिसें संचालनय् हयेवं आः बसं कुहां वयेवं सर्वसाधारणं सुविधा काये खनीगु जूगु दु ।

येँ महानगर प्रमुख विद्यासुन्दर शाक्यं चःबिया उलेज्या यासें दिगो विकासया निंतिं वातावरणमैत्री पूर्वाधार निर्माण व प्रविधियुक्त सहरी सेवा सुविधा बीत महानगर प्रतिवद्ध दु धयादिल । ‘सहरय् सार्वजनिक चःबि आवश्यक दु । अज्याःगु चःबि माः धइगु नं व्यापक माग दु’, महानगर प्रमुख शाक्यं धयादिल, ‘अज्याःगु चःबि थःपिं च्वनेगु थाय् लिक्क दयेका बीमते धाइ । उकिं विवाद पिहां वइला वा ज्या यायां दिकेमाःगु अवस्था वइला धइगु ग्याःचिक दु ।’

थःपिंसं नीति तथा कार्यक्रमयात छसिकथं कार्यान्वयनउ् यंकाच्वनागु व थुकियात निरन्तरता बिया वनाच्वनेगु जुइ धासें सहर दुने ख्वातुगु वस्ती दुगु गुगुं नं थासय् सुयात नं लिच्वः लाइकथं अज्याःगु चःबि दयेकेगु जुइ मखु धयादिल ।

महानगरं दयेकूगु चःबि सुयातं लिच्वः मलाइगु, नमवइगु जक मखु चःबि हे दु कि मदु धइगु तकं सीके मफइकथंया जुइगु खँ कनादिल ।
उपप्रमुख हरिप्रभा खड्गी श्रेष्ठं सार्वजनिक चःबिया आवश्यकता व उकिया गम्भिरतायात थुइकाः थःपिंसं समितिपाखें अध्ययन यानाः जक पूर्वाधार निर्माण यायेगु जुइ धासें थुकथंया नमूनाया ज्यायात विस्तार याना यंकेमाःगु खँय् बः बियादिल ।

येँ मपा ११ वडाअध्यक्षलिसें विधायन समितिया संयोजक हिरालाल तण्डुकारं म्हिगःतक दयेकेमते धकाः दबाव बिया वयाच्वंपिंसं आः वयाः बांलाःगु ज्या याःगु दु धकाः च्वछायेगु याना वयाच्वंगु दु धयादिल ।

एरोशानया नेपाल प्रतिनिधि प्रकाश अमात्यं चःबि धायेवं ध्याकुनय्, खिउँथाय् जुइमाः धइगु मान्यता दुगु धासें महानगरं निर्णय यानाः कार्यान्वयन याःगुज्या नमूना जूगु विचाः तयादिल ।

मिजंतय् निंतिं युरिनल प्यंगू, क्युविकल निगू, मिसातय् निंतिं निगू व छगू समावेशी दुगु ५०० स्क्वायर फीटय् निर्माण याःगु चःबिइ वाति लः मुंकाः प्रशोधन यानाः प्रयोग याये फइ । महानगरं प्रत्येक वडाय् म्होतिं नं छगू थुकथंया सार्वजनिक चःबि दयेकेगु नीति काःगु दु ।

सम्बन्धित बुखँ

LEAVE YOUR COMMENTS