‘सेनायाके फास्ट ट्राय्कया डीपीआर मदु’

येँ-येँ–निजगढ फास्ट ट्राय्क दयेकेगु निंतिं ख्वनाय् क्याम्प खडा याःवःगु नेपाली सेनायाके थ्व परियोजनाया विस्तृत अध्ययन प्रतिवेदन (डिपीआर) तकं तयार मदुगु खँ धाःगु दु ।

थ्व परियोजनाया निंतिं दकलय् न्हापां भारतीय कम्पनी इन्फ्रास्ट्रक्चर लिजिङ एन्ड फाइनान्सियल सर्भिसेज (आइएल एण्ड एफएस) कम्पनीं डिपीआर तयार याःगु खः । भारतीय कम्पनीं थःपिंसं दयेकागु डिपीआरया निंतिं अप्वः ध्यबा माग यायेवं सेनां वंगु थम्हं हे डिपीआर दयेकेगु धाःगु खः ।

आः डीपीआर तकं मदयेकुसे सेनां लँ म्हुइगु निंतिं ख्वनाय् क्याम्प खडा याःवःगु खँ नेपाल साँस्कृतिक पुनजार्गरण अभियान केन्द्रीय दुजः असोज कुमार महर्जनं धयादीगु दु ।

‘सेनां भारतीय कम्पनीं दयेकूगु डिपीआर खारेज यायेधुंकाः न्हूगु दयेकेगु धाःगु खः, तर पुलांगु हे डिपीआर कथं थन सेनां क्याम्प तयेहःगु दु’ अभियन्ता महर्जनं धयादिल ।

न्हूगु डिपीआर दयेकेबलय् ख्वनाया जनताया भावना कथं दयेकेमाःगु वय्कःपिनि माग दु । ‘भारतीय कम्पनीं डिपीआर दयेकूबलय् स्थानीयतय् सरोकार न्यनेगु कुतः तकं मयाः, आः सेनां डिपीआर दयेकेबलय् स्थानीय जनताया खँ न्यनेमाः’ स्थानीयतय्सं धाःगु दु ।

साँस्कृतिक पुनर्जागरण अभियानया हे मेम्ह अभियन्ता अस्तेन्द्र महर्जनं धयादी, ‘जिपिं विकास विरोधी मखु, तर व्यवस्थित रुपं वयेमाल । स्थानीयतय्त विस्थापित यानाः विकास जुइ फइ मखु ।’

तेज महर्जन

च्वमिया मेमेगु

• पासाया जंक्व
• नां जक छुइत हे संघर्ष याःम्ह संजीव कुमार
• आनन्द निकेतन अन्तर्राष्ट्रिय स्तरया सुविधासम्पन्न वृद्धाश्रम
• छु जुयाच्वन अफगानिस्तानय् ?
• न्हूगु ख्वाः, न्हूगु हे त्वाः ससःत्वाः