कोरोना संक्रमण न्हियान्हिथं अप्वः

येँ – निषेधाज्ञा छ्वासुकेवं हानं अप्वया वंगु संक्रमितया ल्याखय् म्हिगः ३,४८१ म्ह न्हूपिं संक्रमित थपे जूगु दु । स्वास्थ्य तथा जनसंख्या मन्त्रालयया कथं म्हिगः १० हजार ९०७ म्हेसिया पीसीआर परीक्षण जूगुली २६१६ म्ह व ५७४९ म्हेसिया एन्टिजेन परीक्षण याःगुली ८६५ म्हेसिके पोजिटिभ पिहां वःगु खः ।

म्हिगः स्वनिगलय् जक ९६४ म्ह संक्रमित पुष्टि जूगु दु । उकथं हे १८८५ म्ह कोरोना मुक्त जूगु दु । कोरोनां कयाः ३० म्ह मनू सीगु दु । सीपिनिगु ल्याः आः १० हजार ८३ म्ह थ्यंगु दु ।

मन्त्रालयया कथं देय्न्यंकं सक्रिय संक्रमितया ल्याः आः ३८ हजार ३३ म्ह दु । थुकी मध्ये ३४ हजार ८१३ म्ह होम आइसोलेसनय् च्वनाच्वंगु दुसा ३२२० म्ह संस्थागत आइसोलेसनय् च्वनाच्वंगु दु ।

कोरोना संक्रमित जूपिं मध्ये ७९६ म्ह आइसोलेसनय् च्वनाच्वंगु दुसा १८४ म्हेसिया भेन्टिलेटरय् तयाः वासः यानाच्वंगु दु । उकथं हे झिदँ स्वयां क्वय्यापिं ७० म्ह मस्तय्के नं कोरोना संक्रमित पुष्टि जूगु दु । थुकी मध्ये नं ११ निसे २० दँया २०५ म्हेसित कोरोना संक्रमित जूगु लूगु दु । संक्रमित अप्वयेवं अस्पतालय् विरामी नं अप्वया वःगु दु ।