‘करिडोर निर्माणं स्वनिगःया ट्«ाफिक सहज’

येँ – प्रहरी महानिरीक्षक सर्वेन्द्र खनालं करिडोर निर्माणं उपत्यकाया ट्राफिक व्यवस्थापन सहज जुया वनाच्वंगु खँ धयादीगु दु । न्हूगु बसपार्क–म्ह्यपी जुयाः वनीगु बालाजु करिडोरया निरीक्षण यानादिसें वय्कलं करिडोरयाकारणं स्वनिगलय् जुइगु ट्राफिक जाम म्हो जुइगु खँ कनादिल ।

महानिरीक्षक खनालं स्वनिगःया ट्राफिक सुधारया निंतिं महानगरीय ट्राफिक महाशाखां स्वलायंकंया कार्ययोजना दयेकाः न्ह्याः वनाच्वंगु खँ कनादिसें करिडोर निर्माण लिसें मू सतकय् खनेदइगु सवारी चाप म्हो जुइगु खँ धयादिल । ‘आःतक ट्राफिक प्रहरीं थीथी निकायलिसे सहकार्य यानाः स्वनिगलय् न्याथाय् करिडोर चायेकेधुंकल, सतक चायेकेवं जक मगाः, स्तरोन्ति नं जुइ ।

थुकिया निंतिं ट्राफिक प्रहरीं सम्बन्धित निकायलिसे समन्वय यानाः न्ह्याः वनी’ वय्कलं धयादिल । उगु हे झ्वलय् महानिरीक्षक खनालं भौतिक पूर्वाधार तथा यातायात व्यवस्था मन्त्रालयया सचिव देवेन्द्र कार्कीयात टेलिफोनं खँ ल्हासें लँपु व्यवस्थित यायेत मन्त्रालयं म्हितेमाःगु भूमिका बारे ध्यानाकर्षण नं यानादीगु खः ।

नेपाल यातायात व्यवसायी राष्ट्रिय महासंघया महासचिव सरोज सिटौलां करिडो निर्माणं नेपाःया राष्ट्रिय बसपार्कय् दुहां वइगु सवारी साधनया चाप म्हो जुइगु खँ कनादिल । ‘करिडोर निर्माणया लिसें सवारी साधन निर्वाध रुपं चले जुइमाः’ वय्कलं धयादिल । येँ महानगरपालिका २६ वडाया अध्यक्ष ख्यामराज तिवारीं करिडोर निर्माणलिसें झोर, तोखा, बानियाटार, न्हूगु बसपार्क, म्ह्यपी, बालाजु, शोभाभगवति जुयाः कालिमाति तक सहज ढंगं सवारी साधन वयेवने यायेफइगु खँ धयादिल ।

‘लँय् ग्राभेल व पिच यायेत स्थानीय सरकार कटिबद्ध दु’ वय्कलं धयादीगु दु । येँ महानगरपालिका १६ वडाया अध्यक्ष मुकुन्दु रिजालं करिडोर निर्माणं बालाजु, माछापोखरी, न्हूगु बसपार्क क्षेत्रय् सवारी साधनया जाम म्हो जुइगु खँ धयादिल । करिडोर निर्माणया निंतिं महानगरपालिकां ग्वाहालि याइगु खँ वय्कलं धयादिल ।

 

सम्बन्धित बुखँ

LEAVE YOUR COMMENTS