मनसुन सक्रिय, क‌ंस तक वा वइगु

येँ -मौसम पूर्वानुमान महाशाखां कंसंतकं देय्या पूर्व व पश्चिमया यक्व थासय् वा वइगु खँ धाःगु दु । महाशाखां स्वन्हुया मौसम पूर्वानुमान यासें पिकाःगु वक्तव्यय् मध्य क्षेत्रपाखे छुं थासय् हल्का व मध्यम कथंया वा वइगु व पूर्व एवं पश्चिमया छगू निगू थासय् तसकं वा वइगु खँ धाःगु दु ।

थुगुसी वंगु असार १४ गतेनिसें देय्न्यंकं मनसुन न्यना वंगु खँ महाशाखां धाःगु दु । वंगु जेठ २५ निसें पूर्व भेगं नेपालय् मनसुन दुहां वःगु खः । तर ताःई तक मनसुन पूवंक सक्रिय जुइमफयाः गाक्क वा वये मफयाच्वंगु खः । आः मनसुनी वर्षाया गतिविधि अप्वया वःगुलिं स्वनिगःया लिसें देय्या यक्व भागय् वा वयाच्वंगु खँ महाशाखां धाःगु दु । महाशाखाया कथं शनिवाः यँेय् ४ मिलिमिटर वा वःगु खःसा दकलय् अप्वः ओखलढुंगाय् २४ मिलिमिटर वा वःगु खः । वा वयेगु सुरु जुइवं स्वनिगःया तापक्रम नं कुहां वःगु दु । स्वन्हु न्ह्यः तक ३०–३१ डिग्री थ्यनाच्वंगु स्वनिगःया तापक्रम आः कुहां वयाः अधिकतम २७ व न्यूनतम १९ डिग्री तक थ्यंगु दु ।

सम्बन्धित बुखँ

LEAVE YOUR COMMENTS