बेरोजगारयात दँय् नीनिद्वः तका

प्रधानमन्त्री रोजगार कार्यक्रम घोषणा

येँ – सरकारं ज्या मदयेका च्वनेमाःपिंत बरोजगार भत्ता बीगु कथं ‘प्रधानमन्त्री रोजगार कार्यक्रम’ घोषणा याःगु दु । प्रधानमन्त्री केपी ओलीं बुधवाः राष्ट्रिय सभा गृहय् छगू ज्याझ्वःया दथुइ थ्व कार्यक्रमया घोषणा यानादीगु खः । सरकारं थ्व ज्याझ्वः मार्फत ज्या मदयेकाः च्वनेमाःपिं बेरोजगार ल्याय्म्हतय्त दछिया म्होतिं नं सछिन्हु ज्या बिइगु योजना दयेकातःगु दु ।

ज्या मदुपिं परिवारया छम्हेसित म्होति नं सछिन्हु ज्या बीमफुत धाःसा सछिन्हुया ज्या पारश्रमिक स्वरुप वइगु ध्यबाया बछि ध्यबा बेरोजगार भत्ता कथं बीगु जुइ । सरकारं थौंकन्हय् श्रमिकतय् न्यूनतम तलब लछिया १३ हजार ४५० तका तोके यानातःगु दु । थ्व ल्याखं न्हिछिया तलब ४४८ तका ३३ पैसा जुइ ।

सरकारी योजना कथं सछि न्हुया रोजगार बीबलय् पारिश्रमिक कथं मुक्कं ४४ हजार ८३३ तका कमे यायेफइ । यदि ज्या बीमफुत धाःसा थुकिया बछि अर्थात २२ हजार ४१६ तका बेरोजगार भत्ता कथं बीगु जुइ । सरकारं न्यादँया दुने बाध्यात्मक वैदेशिक रोजगारीया अन्त्य यायेगु लक्ष्य तयाः ‘प्रधानमन्त्री रोजगार कार्यक्रम’या नामं थ्व ज्याझ्वः घोषणा याःगु खः ।

थ्व योजनाय् ज्या मदुगु परिवारया छम्हेसित जक म्होतिं सछि न्हुया ज्या बीगु जुइ ।‘सकसियां निंतिं रोजगार, संवैधानिक अधिकार’ धयागु नारा बियाः न्ह्याकूगु थ्व ज्याझ्वःया घोषणा यासें प्रधानमन्त्री ओलीं सकलें नेपालीतय्सं स्वये चाहे जूगु न्हि वःगु दावी यानादीगु खः ।
आःया योजना कथं सरकारं थ्व कार्यक्रम कार्यान्वयन यायेत दकलय् न्हापां बेरोजगार ल्याय्म्हतय् तथ्यांक मुंकेगु ज्या याइ ।

थुकी झिंच्यादँ दुपिं निसें न्यय्गुदँ दुपिंसं तक नां दुथ्याकेफइ । थुकिया निंतिं हरेक छगू स्थानीय तहय् छम्ह छम्ह रोजगार संयोजक नियुक्त यायेत्यंगु दु । स्थानीय तहय् नीस्वनीगु रोजगार केन्द्र मार्फत हे तथ्यांक मुंकेगु ज्या याइ । थ्व कार्यक्रमय् थःगु नां दुथ्याके मंदुपिंसं थःगु स्थायी बसोबास दुगु वडा वा रोजगार सेवा केन्द्रय् वनाः निवेदन बीमाः ।

थन वंःगु निवेदनय् रोजगार केन्द्र छानविन यानाः बरोजगारतय् नांधलखय् नां दुथयकेगु याइ । थुगु धलखय् नां दुथ्याःपिंत सरकारं संचालन याःगु आयोजनाय् ज्या याकेत छ्वइ । सरकारं थुकिया निंतिं वइगु असार १० गते दुने बेरोजगार धलः सार्वजनिक यायेगु खँ धाःगु दु । थ्व धलखय् दुथ्याःपिंत सरकारं संचालन यानाच्वंगु ऊर्जा, सडक, पर्यटन, कृषि, वन तथा वातावरण व राष्ट्रिय गौरवया आयोजनाय् ज्या बी । थथे बीगु ज्याय् नं दुथ्याकेमफत धाःसा बेरोजगार भत्ता बी ।

थौं ‘जनताया जलविद्युत आयोजना’ घोषणा

येँ – म्हिगः जक स्वरोजगार ज्याझ्वः घोषणा यानादीम्ह प्रधानमन्त्री केपी शर्मा ओलीं थौं हाकनं मेगु छगू न्हूगु आयोजनाया घोषण याइगु जूगु दु । थनया राष्ट्रिय सभा गृहय् जनताया जलविद्युत आयोजना नांया ज्याझ्वः घोषणा यायेत्यंगु खः ।

‘नेपालको पानी, जनताको लगानी, हरेक नेपाली विद्युतको शेयरधनी’ धइगु नारा बियाः उगु आयोजना घोषणा यायेत्यंगु खः । ऊर्जा तथा जलस्रोत मन्त्रालयं ग्वसाः ग्वःगु आयोजना नेपाःया सकलें जनतायात ब्वति कायेकेगु कथं सरकारं तयारी यानाच्वंगु दु ।

सम्बन्धित बुखँ

LEAVE YOUR COMMENTS