जनप्रभात माविइ प्रविधि कक्षा
येँ – देशय् प्रजातन्त्र स्थापन जुइवं कालिमाटीइ थापना जूगु सामुदायिक विद्यालय जनप्रभाव माविं थःगु ६८ क्वःगु बुद्धिंया न्हिंनिसें सूचना प्रविधिसम्बन्धी कक्षा न्ह्याकूगु दु । थ्यंमथ्यं १० लाख तका खर्च यानाः दयेकूगु कक्षाया येँ मनपाया प्रमुख विद्यासुन्दर शाक्यं उलेज्या यानादिसें सरकारं सामुदायिक विद्यालयय् सञ्चालन याःगु भर्ना अभियानयात ग्वाहालि यायेगु आज्जु कथं महानगर दुनेया फुक्कं सामुदायिक विद्यालयसं माःकथं शैक्षिक सामग्री उपलब्ध याकेगु प्रतिवद्धता प्वंकादीगु दु ।
विद्यालय सञ्चालक समितिया अध्यक्ष रामशरण डंगोलं विसं २००८ सालय् थापना जूगु उगु विद्यालय अग्रेजी व नेपाली निगुलिं माध्यमं ब्वंकेगु याना वयाच्वनागु जानकारी बिसें थुगु दँय् १५० म्ह विद्यार्थी भर्ना यानागु व कक्षा १ निसें १२ तक ६०० विद्यार्थी अध्ययन यानाच्वंगु खँ कनादिल । विद्यालयया प्रधानाध्यापक सतेन्द्रलाल कर्ण विद्यालय व्यावसायिक शिक्षा सञ्चालन यायेत थीथी दातृ संघसंस्थालिसे पहल जुयाच्वंगु खँ कनादिल ।
ज्याझ्वलय् न्ववायेगु झ्वलय् पुलांम्ह विद्याथी कृष्णराज गौतमं उत्पादनलिसे शिक्षायात स्वायेगु नीति मदुगुलिं यानाः देय् विकासया निंतिं माःगु दक्ष जनशक्ति उत्पादन जुइ मफुगु खँ कनादिसें सामुदायिक विद्यालयं ई कथं पाठ्यक्रम विकास यायेमाःगु खँय् बः बियादिल । उगु ज्याझ्वलय् कक्षा १० या विद्यार्थी करिश्मा बस्नेतयात उत्कृष्ट छात्रा पुरस्कार लःल्हाःगु खः ।
LEAVE YOUR COMMENTS