ससफो–नयाँ शक्ति एकता वार्ता
पार्टी एकता जुल धाःसा निम्ह अध्यक्ष दइगु
येँ – नयाँ शक्ति पार्टी नेपाल व संघीय समाजवादी फोरम दथुइ पार्टी एकीकरणया निंतिं सहलह न्ह्यानाच्वंगु खँ विशेष सूत्रं धाःगु दु । तर निगुलिं पार्टीया केन्द्रीय नेतात धाःसा आः थथें एकीकरणयात कयाः न्ववाये चाहे जुयाच्वंगु मदुनि । स्थानीय निकायया चुनाव न्ह्यः हे थ्व निगू पार्टी एकीकरणया तयारी जूगु खःसां दथुइ थीथी विवाद पिहां वयाः एकीकरण ज्या सुथां मलाःगु खः ।
आः एकीकरणया ज्या पूवंकाः जक एकीकरणया खँ सार्वजनिक यायेगु खँय् निगुलिं पार्टीया शीर्ष नेतातय् दथुइ सहमति जुयाच्वंगुलिं तत्काल एकीकरणया खँ पिने मयंकेगु खँ धाःगु दु । पार्टी एकीकरणया निंतिं थौंकन्हय् निगुलिं पार्टीं वार्ता समिति हे दयेकाः ज्या यानाच्वंगु खँ धाःगु दु ।
यदि पार्टी एकीकरण जुल धाःसा थौंकन्हय् नेकपाया थें नयाँ शक्तिपाखें डा. बाबुराम भट्टराई व ससफोपाखें उपेन्द्र यादव निम्ह अध्यक्ष तइगु खँ सूत्रं धाःगु दु । यदि पार्टी एकीकरण जुल धाःसा निर्णय यायेगु जिम्मा नं निम्ह अध्यक्षयात बीगु तयारी जुयाच्वंगु खँ सूत्रं धाःगु दु । पार्टी एकीकरणया निंतिं निगुलिं पार्टीया शीर्ष नेतातय् दथुइ बैठक च्वंगु खँ सीदुगु दु ।
तर निगुलिं पार्टीं थुकियात सार्वजनिक याये चाहे मजू । सूत्रया कथं पार्टी एकीकरणया निंतिं कन्हय् शुक्रवाः नयाँ शक्ति व शनिवाः ससफोया केन्द्रीय समितिया बैठक च्वनेत्यंगु दु । नयाँ शक्तिं राजपा लगायत थीथी चीधंगु पार्टीयात नं एकीकरण प्रक्रियाय् यंकेगु निंतिं सहलह ब्याकाच्वंगु दु ।
नयाँ शक्ति विवेकशील साझालिसे नं वार्ताय् दु । तर वर्तमान अवस्थाय् नयाँ शक्तिं नेपाल कम्युनिष्ट पार्टी व कांग्रेस नाप धाःसा एकीकरण प्रक्रिया न्ह्याकेगु सोच तकं मदुगु खँ छम्ह नां कने चाहे मजूम्ह केन्द्रीय नेतां धाःगु दु ।
नेकपायात ससफोया हाथ्या
२ नम्बर प्रदेशया मुख्यमन्त्री लालबाबु राउतं नेकपायात फुसा थःगु हे नेतृत्वय् सरकार दयेकेत हाथ्या बियादीगु दु । नेकपा अध्यक्ष पुष्पकमल दाहालया धापूया प्रतिवाद यासें मुख्यमन्त्री राउतं थःगु प्रदेशय् फुसा नेकपाया सरकार दयेकि धकाः हाथ्या बियादीगु खः ।
मंगलवाः सुथय् नेकपाया अध्यक्ष पुष्पकमल दाहालं ससफो नेतृत्वया सरकारं भ्रष्टाचार यानाः बेइमानी याःगुलिं थःगु पार्टीया नेतृत्वय् सरकार दयेके फइगु खँ धाःगु खः ।
उकिया प्रतिक्रिया बिसें राउतं उगु खँ धयादीगु खः । केन्द्र सरकार वय्कःया पार्टीया नेतृत्वय् दुगु धासें प्रदेशय् नं फुसा सरकार दयेकाः क्यँ धकाः वय्कलं हाथ्या बियादीगु खः । २ नम्बर प्रदेशय् नेकपां राजपालिसे जानाः सरकार दयेकेगु धकाः वार्ता न्ह्याकाच्वंगु खँ धाःगु दु ।
LEAVE YOUR COMMENTS