लिच्छविकालीन सम्पदा पुनःनिर्माण

ख्वप – ख्वप नगरपालिका वडा नंं.९ स्थित ऐतिहासिक लिच्छविकालीन कुण्डय्च्वंगु महाद्यःया देगः पुनःनिर्माण क्वचाःगु दु। ख्वप नगरपालिकाया मेयर सुनिल प्रजापतिं उगु देगःया उलेज्या यानादीगु खः। देगः नापंच्वंगु कुण्डय् गरुडया तेपुचां लः पिहां वयाच्वंगु तसकं कलात्मक मूर्ति स्थापना यानातःगु दु।

२०७२ सालया तःभुखाय् ब्वःगु इलय् क्षति जूवंगु उगु देगः पुनःनिर्माण यायेत स्थानीय शिवजी प्रजापतिया अध्यक्षताय् छगू उपभोक्ता समिति गठन यानाः ज्या न्ह्याकूगु खः। थ्व स्वयां न्ह्यः ख्वप नगरपालिकां तुमचो दुगुरे जग्गा एकीकरण यायेगु झ्वलय् उगु ऐतिहासिक थाय्यात प्लानिङय् लाकूगु खः।ऐतिहासिक सम्पदा स्थल स्थानीय जनताया कुतलं तार बारं घेरे यानाः एकीकरण जुइगुपाखें बचे यानाः स्वतन्त्र अतित्व ल्यंकातःगु खः।

मेयर प्रजापति, ९ वडाअध्यक्ष रविन्द्र ज्याख्वः लगायतं नगरपालिकाय् निर्वाचित जनप्रतिनिधि वयेवं थुकथंया पुलां पुलांगु सम्पदा, सांस्कृतिक धरोहर ल्यंकेगु ज्या न्ह्यानाच्वंगु कनादिल। ज्याझ्वलय् पुनःनिर्माणय् ग्वाहालि यानादीपिंत हनेज्या नं याःगु खः। करिब झिंछगू करोड लागतय् वंगु फागुण १९ गतेनिसें देगःया जिर्णोद्वार सुरु याःगु खः।