ने. सं. ११४६ अनलाथ्व पुन्हि -

अझं चुनाव लिज्याइगु आशंका

येँ- वैशाख ३० गते यायेगु धकाः घोषणा यानातःगु स्थानीय तहया निर्वाचन अझ नं लिछ्यायेगु लागिं सरकारं कुतः यानाच्वंगु द्वपं सरकारयात लानाच्वंगु दु ।

वर्तमान गठबन्धन सरकार चुनाव यायेत अझ नं इच्छुक खने मदुनि धासें आः सरकारं देशय् ब्वलनाच्वंगु आर्थिक संकटयात त्वह दयेकाः चुनाव लिछ्याये फइगु आशंका याना हःगु दु । खास यानाः श्रीलंकाय् जुयाच्वंगु आर्थिक संकटयात न्ह्यःने तसें नेपाः नं आः आर्थिक संकटय् लानाच्वंगु दु व थज्याःगु इलय् चुनाव यायेत तकं सरकारयाके ध्यबा मदु धासें निर्वाचन लिछ्याये फइगु अनुमान राजनीतिक वृत्तय् याना हःगु दु ।

चुनाव यायेगु लागिं सरकारं थीथी देय्तय्के ग्वाहालि फ्वंगु खःसां उमिसं आःयात ग्वाहालि याये फइ मखु धकाः सरकारयात ध्यबा वा सामग्री मछ्वःगु खँ सार्वजनिक जूगु दु । आः सरकारं थज्याःगु खँयात त्वहः दयेकाः चुनाव मयायेगु कुतः यायेफु धयाहःगु दु । खास यानाः एमाले वृत्तं अझ नं चुनाव जुइ धइगु खँय् विश्वास मदुनिगु खँ धायेगु यानाच्वंगु दु ।

‘विप्लवयात न्ह्यःने तयाः चुनाव लिछ्याइन’

नेकपा एमालेया अध्यक्ष केपी ओलीं नेत्रविक्रम चन्दया पार्टीयात न्ह्यः तयाः प्रधानमन्त्री शेरबहादुर देउवा, माओवादी अध्यक्ष पुष्पकमल दाहाल व माधव नेपालं चुनाव लिछ्यायेगु षडयन्त्र यानाच्वंगु द्वपं बियादीगु दु ।

म्हिगः यलय् जूगु छगू ज्याझ्वलय् न्ववासें वय्कलं चन्दयात ब्वति कायेकेगु नामय् गुगुं नं हालतय् चुनाव लिछ्यायेगु एमालेयात मान्य मजुइगु खँ नं धयादिल । उकथं हे अध्यक्ष ओलीं देउवा, दाहाल व नेपालया पडयन्त्रय् लानाः निर्वाचन लिछ्यायेगु कासाय् मवनेत नं नेत्र विक्रम चन्दयात नं इनाप यानादीगु दु ।

सम्बोधनया झ्वलय् अध्यक्ष ओलीं धयादिल, ‘आः नं निर्वाचन लिछ्यायेगु कुतः जुयाच्वंगु दु, वंगु इलय् नं स्थानीय तह रिक्त यायेगु ज्या शेरबहादुरजीं हे यानादीगु खः, २०५९ थें ज्याःगु अवस्था आः हाकनं मजुइमा । वय्कल देय्यात प्रतिगमनय् थ्यंकूगु रेकर्ड दु । तर थौंकन्हय् शेरबहादुर, प्रचण्ड व माधव चुनाव लिछ्यायेगुपाखे वनाच्वंगु दु ।’

निर्वाचन लिछ्यायेगु अस्त्रया रुपय् चन्दयात क्यनेत स्वयाच्वंगु द्वपं बिसें अध्यक्ष ओलीं धयादिल, ‘निर्वाचन लिछ्यायेत विप्लवयात क्यनेत स्वयाच्वंगु दु, जिं आः हे विप्लवजीयात धयाच्वना, छि लोकतन्त्र विरुद्धया षडयन्त्रय् वनेमते, छि षडयन्त्रकारी नेता मखु, तर षडयन्त्रया शिकार जुइत्यंगु दु ।’

उकथं वय्कलं विप्लवयात थःगु चुनाव चिं सुद्र्यः कयाः निर्वाचनय् वयेत नं इनाप यानादिल ।