एमसीसी पारित याकेत नेकपा नेतातय्त अमेरिकां ह्ययेकाच्वन

येँ – सत्तारुढ दल नेकपाया आन्तरिक विवादय् कानाच्वंगु मिलिेनियम च्यालेन्स कर्पोरेशन (एमसीसी) सम्झौता पारित याकेगु लागिं नेकपाया नेतातय्त ह्ययेकेत अमेरिकां कडा रुपं पहल शुरु याःगु दु । थ्व सम्झौता पारित यानां नेपाःयात फाइदा हे जुइ धइगु खँ थुइकेगु लागिं थौंकन्हय् अमेरिकी राजदूत नेकपा नेतातय् छेँय् छेँय् हे थ्यनाच्वंगु दु ।

थुकिया लागिं लबिङ यायेत नेपाः स्थित अमेरिकी राजदूत ¥याण्डी बेरीं कुतः यानाच्वंगु दुसां उकी हे थप बः बीगु लागिं एमसीसीया सहायक उपाध्यक्ष जोनाथन ब्रुक्स समेत नेपाः वयेधुंकूगु दु । वय्कलं नं नेकपाया नेतातय्त नापलानाः थुकिया बारे ब्रिफिङ यायेगु व ह्ययेकेगु कुतः यानादीगु खँ सीदुगु दु ।

अमेरिकी कुटनीतिक प्रतिनिधितय्सं थ्व इलय् दकलय् अप्वः नेकपाया नेता लिसें विदेश विभाग प्रमुख माधव नेपालयात नापलानाः खँ ल्हानाच्वंगु दु । वयां लिपा उमिसं परराष्ट्र मन्त्री प्रदिप ज्ञवालीयात नं नापलानाच्वंगु दु ।
अथे हे आः नेकपापाखें थ्व सम्झौता बारे निर्णय यायेत गठन याःगु कार्यदलया संयोजक झलनाथ खनाल–यात नं नापलानाच्वंगु खँ सीदुगु दु ।

एमसीसी सम्झौता बारे थौंकन्हय् नेकपा दुने तःधंगु विवाद जूगु कारणं थुकिया बारे निर्णय यायेत थाकुयाच्वंगु दु । थ्वहे सम्झौताया छगू बुँदाया कारणं थुकियात संसदय् यंकाः हे पारित यायेमाःगु आवश्यकता दु । तर संसदय् यंके माःगु जुयाः केन्द्रीय कमिटीइ सहलह जूबलय् आपालं दुजःतय्सं विरोध याःगु जुयाः छुं निर्णय याये मफुगु खः ।

सूत्रतय्सं धाः कथं नेपालं थ्व सम्झौतायात अस्वीकार याइ धइगु खँ अमेरिकाया लागिं आः प्रतिष्ठाया विषय समेत जुया बिउगु दु । थुकिं यानाः नेपाःलिसे न्ह्याथे यानाः नं थ्व सम्झौता यानां त्वःतेगु ताः तयाः अमेरिका सक्रिय जुयाच्वंगु खः ।
थ्व सम्झौता अनुरुप अमेरिकां नेपाःयात ५० अर्ब तका दां ग्वाहालि बी । तर थ्व ग्वाहालिया दां प्रयोग यायेगु लागिं धाःसा भारतया समेत स्वीकृति कायेमाःगु प्रावधानं यानाः थ्व नेपाःया सार्वभौमसत्ताया खिलाफ जुल धकाः विवादय् लानाच्वंगु खः ।

सम्बन्धित बुखँ

LEAVE YOUR COMMENTS