लानिपुखूया झार येँ मनपायात उपहार !
येँ – येँय्या स्थानीय सम्पदाप्रेमीतय्सं येँ महानगरपालिकायात घाँय् उपहार बिउगु दु । पुरातात्विक महत्वया लानिपुखू पुनर्निर्माण यायेगु ज्यायात वेवास्ता याःगु धासें थौंकन्हय् झारैझारया चौरय् परिणत लानिपुखूया वहे झार लिनाः म्हिगः मनपाय् लःल्हाये यंकूगु खः ।
मनपाया उपमेयर हरिप्रभा खड्गी श्रेष्ठयात ज्ञापन पौ सहित घाँय् लःल्हासें सम्पदाप्रेमीतय्सं लानिपुखूयात विज्ञ पुचःया सिफारिस कथं मल्लकालीन शैलीइ दयेकेत माग नं याःगु दु । मेयर विद्यासुन्दर शाक्य प्रधानमन्त्रीलिसे चीन भ्रमणय् झायाच्वंगुलिं उपमेयर खड्गीयात ज्ञापन पौ बिउगु खः ।
सम्पदाप्रमीतय्सं लानिपुखू पुनर्निर्माण लिबाकूगु लिसें हेलचेक्राइ याःगु धासें घाँय् उपहार बिउगु खः । ज्ञापन पौ लःल्हानाः कायेगु झ्वलय् उपमेयर खड्गीं लानिपुखू फयांफक्व याकनं दयेकेगु बचं बियादीगु खः । सीदु कथं मनपां लानिपुखू दयेकेगु निंतिं हाकनं टेन्डर आह्वान यायेगु तयारी यानाच्वंगु दु ।
ज्ञापन पौ बी न्ह्यः उगु पुचलं सुथय् लानिपुखुली यचुपिचु यायेगु ज्या नं याःगु खः । नेपाल प्रहरीया लिसें थीथी थासं वःपिं येँया जनतां पुखू यचुपिचु याःगु खः । लानिपुखू पुनर्निर्माणया झ्वलय् अन लः थाकेमाः धकाः कंक्रिट छ्यलाः पुनर्निर्माण यायेवं सम्पदाप्रेमीतय्सं विरोध याःगु खःसा वयां लिपा कंक्रिटया ज्या दिकूगु खः ।
वयां लिपा लानिपुखू गुकथं दयेकेगु धइगु सुझाव कायेत विज्ञ पुचः नीस्वंगु खः । विज्ञ पुचलं अन पुलांगु शिखर शैलीं हे देगः दयेकेमाः धकाः सुझाव बिउगु खःसा पुरातत्व विभागं धाःसा शिखर शैलीं लानिपुखू दयेके फइ मखु धासें विज्ञ पुचःया प्रतिवेदन अस्वीकार याःगु खः । सम्पदाप्रेमीतय्सं मनपाय् लःल्हाःगु थ्व घाँय्या बोधार्थ पुरातत्व विभागयात नं छ्वःगु दु ।
न्हूकथं सिथिनखः
नेवाःतय्गु तःजिगु नखः सिथिनखः म्हिगः येँया सम्पदाप्रेमीतय्सं न्हूकथं हन । सिथिनखः कुन्हु विशेष यानाः लःया मुहान यचुपिचु याइगु चलन दु । थ्वहे चलनयात म्वाकेगु लागिं म्हिगः उमिसं लानिपुखू यचुपिचु यायेगु ज्या याःगु खः । लानिपुखुली मुनाच्वंगु झाः लिकयाः सफा यायेगु व लःया मुहान बांलाकेगु ताः तयाः अन सफा याःगु खःसा लिपा अन हे च्वंगु झाः मनपाय् उपहार कथं लःल्हाःगु खः ।
LEAVE YOUR COMMENTS