विमान ब्वयेकेत्यंपिं पाइलट ज्वनेवं !

ट्याक्सी चालकं मखुगु ज्या यात धाःसा ज्वंगु घटना ला यक्वं दु । तर पाइलटं मखुगु ज्या यात धाःसा छु जुइ ले ? लिसः सहज दु कि इमित नं ज्वनी । खः स्कटल्याण्डं अमेरिकाया न्यूयोर्क सहरया निंतिं उडान यायेगु तयारी यानाच्वंपिं निम्ह पाइलटयात ज्वंगु दु । स्कटल्याण्डया ग्लास्गो विमानस्थलं अमेरिकाया न्यूयोर्क सहरया निंतिं उडान यायेगु तयारी दुगु युनाइटेड एअरलाइन्सया निम्ह पाइलटयात ज्वंगु खः ।

घटना वंगु वाःया खः । विमान उडान याये न्ह्यः जूगु श्वासप्रश्वास परीक्षणय् असफल जुइवं निम्हं पाइलटयात ज्वंगु खः । ४५ व ६१ दँ उमेरया इपिं निम्ह पाइटलया नां सार्वजनिक याःगु मदु । इमिगु विरुद्ध छुं उजुरी नं दर्ता याःगु मदुसा इमित कुना धाःसा तःगु दु । स्कटल्याण्ड प्रहरीं निम्ह पाइलटयात ज्वंगु पुष्टि यासें इमित अदालतय् पेश यायेगु तयारी तकं जुयाच्वंगु खँ धाःगु दु ।

युनाइटेड एअरलाइन्सया ‘यु ए १६२’ फ्लाइटया जहाज उडान याये न्ह्यः निम्हं पाइटलयात ज्वनेवं विमान उडान रद्द जूग्ु खः । घटना लिपा एअरलाइन्सं छगू विज्ञप्ती जारी यासें थःपिनिगु निंतिं यात्रुतय् सुरक्षा न्हापांगु प्राथमिकता जूगु खँ न्ह्यथंगु दु ।

विमान उडान न्ह्यः निम्हं पाइलटया श्वासप्रश्वासया अवस्थायात कयाः परीक्षण याःगु इलय् अय्लाः त्वना तःगु लूगु खः । थज्याःगु घटनाय् गुगुं कथंया सहनशीलता क्यने मफइगु नं एअरलाइन्सपाखें जारी याःगु विज्ञप्तीइ धयातःगु दु ।