रुसया प्रमुख चिकं टर्मिनलय् भीषण आक्रमण

मस्को – युक्रेनं रुसया छगू प्रमुख चिकं टर्मिनलय् तःधंगु ड्रोन आक्रमण याःगु दु । युक्रेनं रुसया प्रमुख सहर मध्ये छगू पिटर्सबर्गय् च्वंगु छगू प्रमुख चिकं टर्मिनलय् भीषण ड्रोन आक्रमण याःगु खः । युक्रेनं रुसयात युद्धया निंतिं राजस्व उत्पादन याइगु प्रमुख आधारभूत संरचनाय् आक्रमण याःगु खः ।

युक्रेनया राष्ट्रपति भोलोदिमिर जेलेन्स्कीं शुक्रवाः बहनि उगु आक्रमण याःगु जानकारी बिसें थःपिनि सेनां रुसयात युद्धया निंतिं राजस्व उत्पादन याइगु प्रमुख संरचनाय् आक्रमण याःगु दावी याःगु दु । अथे हे जेलेन्स्कीं रुसया छगू प्रमुख जलसैनिक अड्डाय् नं आक्रमण याःगु दावी याःगु दु ।

रुसया पिटर्सबर्गया गभर्नर अलेक्जेन्डर बेग्लोभं नं थःगु सहरय् भीषण ड्रोन आक्रमण जूगु पुष्टि यासें आक्रमणं चिकंया टर्मिनलय् क्षति जूगु धाःगु दु । यद्यपि थुगु आक्रमणय् मानवीय क्षतिया अवस्था छु दु धइगु बारे धाःसा छुं खुले याःगु मदु । लिपांगु इलय् युक्रेनं रुसया महत्वपूर्ण उर्जा पूर्वाधारय् तीव्र आक्रमण याना वयाच्वंगु दु ।