रुसी सैनिक राजधानी किभय् थ्यन

एजेन्सी- युक्रेनय् रुसं मदिक्क आक्रमण यानाच्वंगु दु । बिहिवाः निसें युक्रेनया थीथी थासय् आक्रमण यानाच्वंगु रुसी सेना राजधानी किभय् प्रवेश याःगु युक्रेनी अधिकारीतय्सं पुष्टि याःगु दु । युक्रेनया रक्षा मन्त्रालयं ट्विट यानाः शत्रु ओबालान लागा थ्यंगु जानकारी बिउगु खः । युक्रेनया अधिकारीतय्सं स्थानीयतय्त प्रतिकार यायेत प्रोत्साहित नं याःगु दु । बिबिसीं बिउगु जानकारीकथं राजधानीइ ततसःगु विस्फोटया सः तायेदयाच्वंगु दु । रुसी सेनालिसें द्वलद्वः बेलारुसया सेना नं दुगु खँ धाःगु दु ।

युक्रेनय् रुसी सेनाया प्रवेश लिपा एयर रेड साइरन न्याकेगु जुयाच्वंगु दु । युक्रेनं चार्नोबिल आणविक भट्टी नं रुसी सेनां कब्जाय् कायेधुंकूगु धाःगु दु । युक्रेनया राष्ट्रपति भोलोदिमिर जेलेन्स्कीं प्यन्हुया दुने रुसं किभयात कब्जा कायेफइगु आशंका याःगु दु । राष्ट्रपति भोलोदिमिर जेलेन्स्कीं रुसया निशानाय् थः व थःगु परिवार दुगु नं धाःगु दु । युक्रेनय् आतकया दुने १३७ म्ह युक्रेनी सीगु व ३१६ म्ह घाःपाः जूगु धाःगु दु । अथेहे ३३ गू गैरसैनिक स्थलय् रुसं बमबारी याःगु द्वपं युक्रेनं बिउगु दु ।

रुसं युक्रेनय् याःगु आक्रमणया विरुद्ध अमेरिका, बेलायतलिसें युरोपेली संघं थप प्रतिबन्धया घोषणा याःगु दुसा युक्रेनं थप ग्वाहालि यायेत इनाप याःगु दु । जेलेन्स्कीं रुसया प्रतिरोध मयासे नाटों रुसया आक्रमण स्वयाजक च्वंगु धाःगु दु ।

युक्रेनय् याःगु हमलाया विरुद्ध रुस दुने नं विरोध प्रदर्शन जूगु दु । रुसया द्वलंद्वः मनूत सतकय् कुहां वःगु दु । रुसया राजधानी मस्को, सेन्ट पिटर्सबर्ग व थीथी सहरय् आक्रमणया विरोधय् प्रदर्शन जूगु दु । प्रदर्शनय् वःपिं १७०० म्ह मनूतय्त ज्वंगु दु ।

रुसी पलाःयात कयाः भारत, पाकिस्तान, इरान व टर्कीं रुसलिसे वार्ता याःगु दु । भारतया प्रधानमन्त्री नरेन्द्र मोदी, पाकिस्तानया प्रधानमन्त्री इमरान खान, इरानया राष्ट्रपति सय्यद इब्राहिम रैसी व टर्कीया राष्ट्रपति रेचेप एर्दोआनलिसे रुसी राष्ट्रपति भ्लादिमिर पुटिनं युक्रेन आक्रमणयात कयाः वार्ता याःगु खः ।

सम्बन्धित बुखँ

LEAVE YOUR COMMENTS