चीन–भारत ल्वापुइ २०म्ह भारतीय सैनिकतय् ज्यान वन

बिबिसी– चीन व भारत दथुया ल्वापुइ नीम्ह भारतीय सेना सीवं चीनं भारतयात थःपिनि सेनायात पनाः संवादया लँपुं विवाद ज्यंकेत धाःगु दु । चीनया सरकारी समाचार एजेन्सी सिन्ह्वाया कथं पिपल्स लिबरेशन आर्मी (पिएलए)या पश्चिमी थिएटर कमान्डया प्रवक्ता चांग शुइलीं पिएलएया आधिकारिक वीबो एकाउन्टय् छगू पोस्ट यासें थ्व खँ धाःगु दु ।

चांगं धाःगु दु, ‘भारतीय सैनिकतय्सं थःपिनि सहमतिया उल्लंघन यानाःगु हाकनं छक्वः एलएसी पार याःगु दु । अले सिइक चायेकं चिनियाँ बलयात उक्से यानाः उमित आक्रमण याःगु दु । गुकिं यानाः थ्व झडप जूगु दु, अले सैनिकतय् ज्यान वंगु खः । भारतं थःपिनि सैनिकयात पनेत कडा पलाः छीत व वार्ता पाखें विवाद ज्यंकेत माग याना ।’

भारत व चीन दथुइ सीमा लाःगु गलवान उपत्यकाय् वंगु सोमवाः चान्हय् जूगु भिडन्तय् २० म्ह भारतीय सैनिक सीगु खः । भारतीय सेनां थ्वयां न्ह्यः स्वम्ह सैनिक सीगु खँ धाःगु खःसा लिपा हाकनं २० म्ह सीगु खँ स्वीकार याःगु खः ।

भारतीय सेनां धाःकथं झडपया झ्वलय् गम्भीर रुपं घाःपाः जूपिं १७ म्ह सैनिकत शून्य स्वयां क्वय्या तापक्रमया कारणं सीगु खः ।

भारत व चीन दथुइ सैनिकतय् ज्यान हे वंक ४५ दँ लिपा थुकथं झडप जूगु खः । सन् १९७५ लिपा निगू देय् दथुइ सैनिकतय् ज्यान वंगु ल्वापु जूगु मदुनि । निगू देय् दथुइ सन् १९६२ लद्दाखय् तःधंगु युद्ध हे जूगु खः । थ्व लडाइँलय् चीन त्याःगु खः । थ्व लिपा नं सीमा लागाय् निगुलिं देय्या सेना दथुइ इलय् ब्यलय् चिचिधंगु ल्वापु जुयाच्वनेगु याः ।