फास्ट ट्रय्राकया पःखाः दयेगुपाखें ठेकेदार लिचिल

येँ (नेपालभाषा टाइम्स) – खोनाय् फास्ट ट्रयाय्क दयेकेगु झ्वलय् म्हिगः स्थानीय जनतां अन दयेकाच्वंगु पःखाः थुनाबिउगु दु । म्हीग हे ठेकेदारं अन पःखाः दयेकेगु ज्या न्ह्याकूगु खःसा स्थानीय जनतां विरोध याःगु खः । तर विरोध याःपिं स्थानीय जनता म्हो जक जुइवं ठेकेदारतय्सं गुण्डागर्दींशैली थःगु ज्या न्ह्याकेवं स्थानीय वासिन्दां सामाजिक सञ्जालपाखे विरोधया आह्वान यायेवं म्हिगः स्वनिगःया थीथी थासं स्थानीय जनतायात तिबः बीत मनूत मुनेवं ठेकेदार लिच्यूगु खँ अभियन्ता महेन्द्र ब्रम्हचार्य ‘नेपालभाषा टाइम्स’ यात कनादीगु दु ।

फास्ट ट्रय्राकया निंतिं उगु पखाः दनधाःसा बुंग द्यःया जात्रा हे प्रभावित जुइफइगु धासें स्थानीय जनतां विरोध याना वयाच्वंगु खः । स्थानीय जनताया कथं पुतुवार समुदायं बुँज्या याना वयाच्वंगु उगु बुँ सतक दयेकेगु ज्या जुल धाःसा जात्रा यायेत माःगु आयस्ता मदइगु जूगुलिं स्थानीय जनतां विरोध याना वयाच्वंगु खः । थ्व स्वयां छुं न्हिं न्ह्यः जक स्थानीय विकास मन्त्री कृष्णगोपाल श्रेष्ठ व प्रधानमन्त्रीया कलाः खोनाया निरीक्षण यायेगु झ्वलय् ख्वनाया संस्कृतियात लिच्वः मलाइ कथं फास्ट ट्रायक दयेकेगु बचं बिउगु खः ।