ने. सं. ११४३ चौलाथ्व सप्तमी -

पासा पुचः गुथिया २१ क्वःगु साधारण सभा

येँ(नेपालभाषा टाइम्स)- बेलायतय् च्वंपिं नेवाःतय् संस्था पासा पुचः गुथि बेलायतया नीछक्वःगु साधारण सभा वंगु आइतवाः जुल । लन्दनस्थित बोस्टन परेडय् जूगु साधारण सभां पुलांगु ज्यासना पुचःया कार्यकाल विधिवत रुपं क्वचाःगु घोषणा यासें न्हूगु ज्यासना पुचः ल्यःगु खः ।

गुथिया नायः रुक्मणी मानन्धरया सभापतित्वय् जूगु साधारण सभाय् गुथिपाखें ग्वसाः ग्वःगु थीथी ज्याझ्वःया बारे जानकारी बिउगु खः । गुथिं वंगु निदँया दुने कोरोना संक्रमणया कारणं अप्वःथें ज्याझ्वः भर्चुअल माध्यमं जूगु जानकारी गुथिया मूछ्याञ्जे प्रणिशा शाक्यं बियादीग खः ।

गुथिं बिउगु जानकारीकथं वंगु निदँया कार्यकालय् मुक्कं झिंन्हय्गू ज्याझ्वः जूगु व उकीमध्ये झिंस्वंगू ज्याझ्वः भर्चुअल माध्यमं व प्यंगू ज्याझ्वः भौतिक उपस्थितिइ यायेत सफल जूगु दु । अथेहे दांभरिं सविता मानन्धरं निदँया कार्यकालय् जूगु खर्चया ल्याःचाः न्ह्यब्वयादीगु खः ।

न्हापांगु सत्र क्वचायेकाः निगूगु सत्रय् वइगु सन् २०२२–२०२४या निंतिं न्हूगु ज्यासना पुचःया ल्यज्या नं याःगु खः । गुथिया संस्थापक दुजःपिं बालमुकुन्द जोशी, शशिधर मानन्धर व अमृतरत्न स्थापित दुथ्याःगु निर्वाचन कमिटीं न्हूगु ज्यासना पुचःया ल्यज्या याःगु खः ।

झिंन्याम्हेसिया न्हूगु ज्यासना पुचलय् रुक्मणी मानन्धर नायः, आजेस सिंह व प्रणिशा शाक्य न्वकु, लिसा दली श्रेष्ठ मूछ्याञ्जे, मनिष जोशी लिउछ्याञ्जे, सविता मानन्धर दांभरिं, रोजी मानन्धर लिउ दांभरिं ल्यःगु दु । अथे हे सांस्कृतिक सचिवय् आस्था जोशी बाटाजु, कासा सचिवय् किरण मानन्धरयात ल्यःगु दुसा दुजलय् अमिता श्रेष्ठ, मन्दिरा मानन्धर, एन्जिला श्रेष्ठ, पब्लिका श्रेष्ठ, मधुसुदन कायस्थ व सन्दीप तुलाधरयात ल्यःगु दु ।

उगु इलय् लोकसाहित्य परिषद्पाखें गुथियात प्राप्त प्रशंसा पत्र नायः मयजु मानन्धरयात लःल्हायेगु ज्या नं जूगु खः ।