सिजन श्रेष्ठ न्हूम्ह नायः निर्वाचित
येँ – हलिं नेवाः दबूया स्वक्वःगु तःमुँज्यां वर्तमान नायः सिजन श्रेष्ठयात हे हानं नायः कथं ल्यःगु दु । नायः पदया लागिं प्रत्याशी जुयादीम्ह मेम्ह उम्मेदवार दयारत्न शाक्यं थःगु उम्मेदवारी लित कयाः समझदारी यानादीगुलिं भाजु श्रेष्ठयात तःमुँज्यां निर्विरोध नायः ल्यःगु खः ।
वय्कःपिनि दथुइ जूगु सहमति कथं आः स्वदँया कार्यकालय् दत्या सिजन श्रेष्ठ नायः जुयादीसा दछि लिपा वय्कलं राजीनामा बियाः दयारत्न शाक्ययात नायः दयेकादी । तःमुँज्या दबुली हे वयाः वय्कःपिंसं सहमति बारे जानकारी यानादीगु खः । तःमुँज्यां न्वकु पदय् बेलायतय् च्वनादीम्ह शशि महाजुयात ल्यःगु दु । लिसें केन्द्रीय दुजलय् नेपाःपाखें शाक्य सुरेन, रश्मीला प्रजापति व सुरेन्द्रभक्त श्रेष्ठयात ल्ययेगु घोषणा नं जूगु दु । म्हिगः बहनी ६.३० बजे तक मेपिं पदाधिकारी लगायत दुजःत ल्ययेगु ज्या धाःसा मजूनि ।
नरेन्द्रभक्त हाडाया अध्यक्षताय् च्वंगु बन्द सत्रं सिजन श्रेष्ठयात पुनः सर्वसम्मत नायः ल्ययेगु ज्या याःगु खः । हलिं नेवाः दबूया स्वक्वःगु तःमुँज्या शुक्रवाः राष्ट्रिय सभागृहय् वाङ्मय शताब्दी पुरुष सत्यमोहन जोशीं उलेज्या यासें शुरु जूगु खः । उलेज्याय् येँ महानगरपालिकाया मेयर विद्यासुन्दर शाक्य, जनकवि दुर्गालाल श्रेष्ठ, नेवाः न्ह्यलुवा मल्ल के. सुन्दर व ल्याय्म्हम्ह नेवाः अधिकारकर्मी कथं सुरेश किरण मानन्धरं नुगःखँ तयादीगु खः । दबूया नायः सिजन श्रेष्ठया सभापतित्वय् न्ह्याःगु उगु ज्याझ्वलय् थीथी ख्यलय् ज्या यानाच्वंपिं झिम्ह नेवाः व्यक्तित्वपिंत हनेगु ज्या नं याःगु खः ।
अथे हे म्हिगः येँया बसन्तपुलिं छगू ¥याली न्ह्याकुसें नेवाः दिवस हनेगु ज्या नं याःगु खः । कुमारी, लाखे लिसें थीथी जातीय खलः पुचःया प्रतिनिधित्व यासें वःगु बाजंगाजं सहित शुरु जूगु ¥याली राष्ट्रियसभाय् थ्यंकाः छगू सभाय् हिउगु खः । ज्याझ्वलय् येँ मनपाया मेयर विद्यासुन्दर शाक्यं ‘निक्वःगु हलिं नेवाः दिवस’ च्वयातःगु ब्यानर सहितया बेलुन ब्वयेकादीगु खःसा दबूया नायः सिजन श्रेष्ठं नेवाः दिवसया महत्व बारे कनादीगु खः ।
म्हिगः व म्हीग निन्हुयंकं हलिं नेवाः दबूया भावी ज्याझ्वः, नेवाः आन्दोलनय् मिसापिं, नेवाः आन्दोलनय् युवा पुस्ता, नेवाः उद्यमशीलता विषयय् पुचः सहलह ज्याझ्वः नं जूगु खः ।
LEAVE YOUR COMMENTS