लकडाउन लिपा चीनया अर्थतन्त्र न्हापांखुसी वृद्धि

एजेन्सी – कोरोना भाइरसयात नियन्त्रणय् हयेधुंकूगु चीनया अर्थतन्त्र वृद्धि जूगु दु । कोरो नाया कारणं थ्व दँया न्हापांगु स्वलाय् मन्दी खनेदुगु खःसां निगूगु त्रैमासिकय् ३.२ प्रतिशतं आर्थिक वृद्धि खनेदुगु दु । विश्वया हे निगूगु तःधंगु अर्थतन्त्र २०२० या न्हापांगु स्वलाय् धाःसा ६.८ प्रतिशतं कुहां वंगु खः ।

बुधवाः पितबीगु निगूगु त्रैमासिकया विवरणय् धाःसा चीनया कुल गार्हस्थ उत्पादन जीडीपी थहां वंगु खनेदुगु खः । आः खनेदुगु वृद्धिदर विज्ञतय्सं अनुमान याःगु स्वयां अप्वःगु खँ धाःगु दु । चीनया अर्थतन्त्र कोरोना नियन्त्रण लिपा ह्वात्त हे थहां वंगु खः । थुकिया अर्थ चीन प्राविधिक रुपं आर्थिकमन्दी पाखें बचे जूगु दु । छाय्धाःसा यदि आर्थिक मन्दी हयेगु खःसा निगू त्रैमासिक अथवा खुला अर्थतन्त्र कुहां वनेमाः ।

विज्ञतय्सं चीनं अनपेक्षित रुपं लकडाउन लिपा अर्थतन्त्रय् सुधार हःगु खँ धाःगु दु । जर्मन ब्यांकया छगू अध्ययनय् चीनया अर्थतन्त्रया पुनर्उत्थान लगभग पूवंगु खँ न्ह्यथनातःगु दु । वंगु मे महिनाय् चीन कोरोभाइरसया महामारी दथुइ सन् २०२० य् आर्थिक वृद्धिया लक्ष्य मतयेगु खँ धाःगु खः । सन् १९९० लिपा चीनं वार्षिक वृद्धिया लक्ष्य मतःगु थ्व न्हापांखुसी खः ।