ने. सं. ११४३ तछलाथ्व दशमी -

इरान विरुद्ध अमेरिकाया न्हूगु प्रतिबन्ध

वाशिंगटन – अमेरिकी राष्ट्रपति डोनाल्ड जे. ट्रम्पं इराननापं व्यापारिक सम्बन्ध तइगु देशं अमेरिका नापया थःपिनिगु व्यापारिक सम्बन्ध न्ह्याके मफइगु खँ धाःगु दु । सन् २०१५ य् जूगु परमाणु सम्झौतां इरान लिचिलेवं अमेरिकी राष्ट्रपति ट्रम्पं इरान विरुद्ध न्हूगु प्रतिबन्धया घोषणा यायेगु झ्वलय् ट्विट यासें उगु खँ धाःगु खः ।

अमेरिकां इरान विरुद्ध तःगु न्हूगु प्रतिबन्ध अटोमोबाइल क्षेत्र नापं इरानया लुँ व बहुमूल्य धातुया व्यापारय् लगे जुइ । न्हूगु प्रतिबन्ध हाचां गाल धाःसा उकिया गम्भिर लिच्वः फयेमालीगु ख्याच्वः नं राष्ट्रपति ट्रम्पं बिउगु दु । यद्यपि न्हूगु प्रतिबन्ध व आर्थिक दबावया कारणं इरान न्हूगु सम्झौताया निंतिं तयार जुइगु व इरानं थःगु आणविक गतिविधि नं दिकीगु विश्वास ट्रम्पया दु ।

‘इरान विरुद्ध आधिकारिक रुपं प्रतिबन्ध तयेधुंगु दु, थ्व आतकया हे दकलय् कडा प्रतिबन्ध खः’ ट्रम्पं यासें धाःगु दु, ‘वइगु नोभेम्बरय् थ्व प्रतिबन्ध अझ अप्वइ, सुनानं इराननापं सम्बन्धी कायम यानातयेगु खःसा वं अमेरिकानापया सम्बन्ध न्ह्याके फइमखु । जिं विश्वया शान्तिया निंतिं थथे यानागु खः, थ्व स्वयां म्हो छुं जुइमखु ।’

अमेरिकाया न्हूकथंया प्रतिबन्ध लिपा इरानी राष्ट्रपति हसन रुहानीं अमेरिकी पलाःयात मनोवैज्ञानिक युद्धया संज्ञा बिउगु दु । इरानी राष्ट्रपति रुहानीं सरकारी टेलिभिजनय् संबोधन यासें अमेरिकानाप तत्काल वार्ताया सम्भावना मदु धासें वार्ता यायेगु पक्षय् दुसां उकी कूटनीति व इमान्दारीता अति आवश्यक जूगु धाःगु दु ।

सन् २०१५ य् इरान नापं जूगु सम्झौताय् ल्हाःचिं तःगु चीन, रुस, बेलायत, फ्रान्स, जर्मनीलिसें इजरायल, साउदी अरबं अमेरिकाया लिपांगु पलाःयात कयाः कडा आलोचना याःगु दु ।अबलय् जूगु सम्झौताकथं इरानं थःगु विवादास्पद परमाणु गतिविधि नियन्त्रण यायेगु व उकिया पलेसा प्रतिबन्ध छ्वासुकेगु प्रावधान तयातःगु खः ।

इरानं थःगु आणविक ज्याझ्वः शान्तिपूर्ण उद्देश्यया निंतिं जूगु दावी याना वयाच्वंगु दु ।
ट्रम्पं थःगु चुनावी अभियानय् हे सम्झौताया विरोध याना वयाच्वंगु खः ।