
एजेन्सी- भारतय् अनलाइन कासा पब्जी म्हितके मबिल धकाः छम्ह झिंखुदँ दुम्ह नचाल्याय्म्ह थः हे मांयात गोलीं कयेकाः स्यानाबिउगु दु । भारतया उत्तर प्रदेशया लखनऊलय्लाःगु यमुनापुरम कोलोनीं थ्व घटना जूगु खः ।
स्थानीय प्रहरीं धाःकथं घटना जूगु परिवारय् मांम्ह थः निम्ह मस्त लिसे कोलोनी च्वनाच्वंगु खःसा अबुम्ह धाःसा जागिरया कारणं पश्चिम बंगालय् च्वनाच्वंगु जुयाच्वन । मांम्हेसिनं झिंखुदँया कायम्हेसित न्ह्याबलें पब्जी म्हितेत पनीगु जुयाच्वन ।
पब्जीया कुलतय् लाःम्ह कायम्हेसिनं आइतवाः सुथय् थः अबुया लाइसेन्स कयातःगु पिस्तोलं मांम्हेसित गोलीं कयेकाः स्यानाबिउगु जुयाच्वन । मांम्हेसिया सीम्ह मंगलवाः जक लुइकूगु खः । क्षतविक्षत अवस्थाय् दुगु सीम्ह पोस्टमार्टमया निंतिं अस्पताल यंकूगु दुसा कायम्हेसित प्रहरीं ज्वनेधुंकूगु दु ।
प्रहरीं धाःकथं मांम्हेसित स्यायेधुंकाः कायम्हेसिनं सीम्ह निन्हु तक क्वथाय् हे तयातःगु जुयाच्वन । मांम्हेसित गोलीं कयेकूबलय् वया गुदँ दुम्ह केहेँम्ह नं न्ह्यःने हे दुगु खः । दाजुम्हं केहेँम्हेसित सुयातं धायेमते धकाः ख्यानातःगु खः । निन्हु लिपा सीम्ह नवयावयेवं रुम फ्रेसनर तयाः नवःगु तंकेगु कुतः नं याःगु जुयाच्वन ।
सीम्ह तसकं नवयावयेवं काम्हं अबुम्हेसित फोन यानाः घटनाबारे जानकारी बिउगु खःसा अबुम्हं तुरुन्त जःलाखःलायात फोन यातसा जःलाखःलां प्रहरीयात सःतूगु खः ।
प्रहरीया कथं सुरुइ कायम्हेसिनं घटनायात कयाः मखुगु खँ ल्हाःगु खः । वं हत्या थःम्हेसिनं यानागु मखुसे छेँय् मत दयेकः वयाच्वंम्हेसिनं याःगु धकाः धाःगु खः । उम्ह मनूयात न्यनेकने यायेधुंकाः कायम्हं मखुगु खँ ल्हानाच्वंगु सिइकूगु खः । भारतय् पब्जी प्रतिबन्ध तयातःगु दु । तर थ्व प्रतिबन्ध मोबाइल भर्सनय् जक दु, डेस्कटपय् म्हिते जिउ ।
LEAVE YOUR COMMENTS