ट्विटरं एकाउन्ट ब्लक याःगुलिं राहुल गान्धी आक्रोसित
एजेन्सी÷ भारतीय कांग्रेसया नेता राहुल गान्धी ट्विटरं थःगु एकाउन्ट ब्लक याःगुलिं आक्रोशित जूगु दु । नेता गान्धीं ट्विटरयात एकाउन्ट ब्लक यानाः भारतया राजनीतिक प्रक्रियाय् हस्तक्षेप याःगु द्वपं बिउगु दु ।
नेता गान्धीं युट्युबं भिडियो मार्फत थथे धाःगु खः । गान्धीं भिडियोय् धाःगु दु ‘छगू कम्पनीं थःपिनिगु व्यापारमार्फत भारतया राजनीतियात परिभाषित यानाच्वंगु दु, छम्ह राजनेताया हैसियतं थ्व जित ययाच्वंगु मदु । जिगु ट्विटर एकाउन्ट बन्द यानाः उमिसं झीगु राजनीतिक प्रक्रियाय् हस्तक्षेप याःगु दु । थ्व लोकतन्त्रविरुद्ध हमला खः ।’
नेता राहुल गन्धीं धाःगु दु ‘थ्व राहुल गान्धीयात जूगु हमला मखु, थ्व ट्विटरय् जिलिसें स्वानाच्वंपि जिगु थ्यंमथ्यं निगू करोड फलोअर्सया बिचाः सिइकेगु अधिकारया हनन खः । जिमित संसदय् नवाकेमबिउ, ट्विटर छगू आशाया किरण धकाः च्वनागु, तर आः ट्विटर नं निष्पक्ष मञ्च मखुत, पक्षपाती जुल, सरकारया खँ जक न्यन ।’
ट्विटरं वंगु शनिवाः नेता गान्धीं दिल्लीइ बलात्कार जूम्ह गुदँ दुम्ह मिसामचाया छेँजःपिनिगु किपा सेयर यायेवं एकाउन्ट ब्लक याःगु खः । ट्विटरं कम्पनीया नियम हाचां गाःगुलिं एकाउन्ट ब्लक यानागु धाःगु दु । नेता गान्धीलिसें मेपिं न्याम्ह कांग्रेसया नेतातय्गु एकाउन्ट ट्विटरं ब्लक याःगु खः ।
LEAVE YOUR COMMENTS