नेपाल संवत् आन्दोलनया भविष्यबारे गोष्ठी

येँ (नेपालभाषा टाइम्स)- नेपाल संवत्या आन्दोलन लिसें भविष्यय् थ्व अभियानयात गय् यानाः न्ह्याकेगु धइगु विषययात कयाः नेपाल संवत् राष्ट्रिय गोष्ठी जुल । नेवाः देय् दबूया संयोजनय् नेपालभाषा मंकाः खलः येँ, नेपाल संवत् न्हूदँ राष्ट्रिय समारोह समिति, राष्ट्रिय विभूति शंखधर साख्वाः प्रतिष्ठान, नेपालभाषा मंकाः खलः यल, यल नेवाः समाज व विराट नेपालभाषा साहित्य सम्मेलन गुथिया मंकाः ग्वसालय् जूगु उगु राष्ट्रिय गोष्ठीइ देय्न्यंकंया थीथी २२ गू जिल्लाया नेवाः खलः पुचःया प्रतिनिधितय्सं ब्वति काःगु खः ।

ज्याझ्वलय् मू वक्ता कथं न्ववासें नेपाल संवत् आन्दोलनया न्ह्यलुवा मल्ल के. सुन्दरं नेपाल संवत्या न्हूदँ धइगु केवल लसता हनेगु विषय जक मखु, थुकी नेपाःया राष्ट्रियतायाया खँ नं स्वानाच्वंगु दु धयादिल । नेपाल संवत् धइगु केवल संवत् जक मखुसें थ्व लोककल्याणकारी दर्शनया विषय समेत जूगु कारणं आः शंखधर साख्वाःयात विश्वय् लोक कल्याणकारी दर्शनया प्रणेताया रुपय् स्थान बीमाः धकाः राष्ट्र संघय् दावी यायेमाःगु खँ नं वय्कलं कनादिल ।

अथे हे नेपाल संवत् नेपाःया छगू विशिष्ट सम्पदा समेत जूगुलिं थ्वयात नेपाःया अमूर्त विश्व सम्पदाया धलखय् दुथ्याके बीगु लागिं राष्ट्र संघीय निकाय युनेस्कोय् दावी यायेमाःगु सुझाव नं वय्कलं बियादल । सरकारी दस्तावेजय् नेपाल संवत् उल्लेख यायेगु सरकारया घोषणा लिपा आः नेपाःया मुद्रा, नागरिकता, सवारी लाइसेन्स, पासपोर्ट आदि थेंज्याःगु भ्वँतय् नं नेपाल संवत्या तिथि उल्लेख जुइ माःगु माग वय्कलं यानादिल ।

गोष्ठीया न्हापांगु सत्रय् नेपाल संवत्या औचित्यबारे प्रा.डा. नरेशमान वज्राचार्य, गोष्ठीया औचित्यबारे पवित्र वज्राचार्य, शंखधर साख्वाःया म्हसीका बारे ज्ञानराम श्रेष्ठं प्रष्ट यानादीगु खःसा नेपाल संवत्या छ्यलाबुलाय् प्रविधि मैत्रीया विकास बारे प्रस्तुति नं जूगु खः ।

ज्याझ्वलय् नेपाल संवत् आन्दोलनया भावी कार्यदिशा, ने.सं. छ्यलाबुलाया सन्दर्भय् राज्यस्तरं यायेमाःगु ज्या व ने.सं. छ्यलाबुलाया सन्दर्भय् समुदास्तरं यायेमाःगु ज्या धइगु स्वंगू विषयय् पुचः सहलह जूगु खः । ज्याझ्वलय् मल्ल के. सुन्दरं च्वयादीगु ‘ नेपाल संवत् व भिंतुना आन्दोलन’ नांगु सफू नं विमोचन जूगु खः ।