ज्यापु महागुथि किपूया अधिवेशन

किपू(नेपालभाषा टाइम्स)- ज्यापु महागुथि नेपाः किपू नगर समितिया न्याक्वःगु अधिवेशन वंगु शनिवाः जुल । अधिवेशनं किपू नगर समितिया न्हूधाः नं याःगु खः ।

महागुथिया केन्द्रीय नायः राजभाई जकःमि मूपाहाकथं झायादीगु ज्याझ्वलय् विशेष पाहांकथं बागमति प्रदेशया पर्यटन, उद्योग व सहकारी मन्त्री पुकार महर्जन, किपू नगरपालिकाया उपप्रमुख शुभलक्ष्मी शाक्य पाहांकथं महागुथिया केन्द्रीय वरिष्ठ न्वकु सन्तु महर्जन,न्वकु सत्यनारायण डंगोल, मूछ्याञ्जे मचाराजा महर्जन झायादीगु खः ।

अधिवशेनया निगूगु सत्रं महागुथिया किपू नगर समितिया न्हूगु ज्यासना पुचः नं ल्यःगु खः । नगर समितिया वइगु स्वदँया कार्यकालया निंतिं रामभोला महर्जनया अध्यक्षताय् नीछम्हेसिया ज्यासना पुचः ल्यःगु खः।

न्हूगु ज्यासना पुचलय् रामचन्द्र डंगोल व सुवर्ण महर्जन न्वकु, कमला महर्जन छ्याञ्जे, किरण महर्जन लिउछ्याञ्जे, सागर महर्जन दांभरिं व सिजन महर्जनयात लिउ दांभरिं ल्यःगु दुसा दुजलय् बेखाराम महर्जन, अरुण डंगोल, बिदुर महर्जन, विनोद महर्जन, सबिन महर्जन, ग्यालर महर्जन, अधिवक्ता ज्ञानबहादुर महर्जन, शान्ति महर्जन, पार्वती महर्जन, अनिता सिंह, मनदेवी महर्जन, रुपेन्द्र महर्जन, सरलगोपाल महर्जन, कविकुमार महर्जनयात ल्यःगु दु ।