ख्वनाया जग्गा अधिकरणया विवादयात कयाः नेवाः मोर्चाया ध्यानाकर्षण

येँ – नेवाः राष्ट्रिय मुक्ति मोर्चा, नेपालं फास्ट ट्र््याकया निंतिं ख्वनाय् जग्गा अधिकरण व उकिं ब्वलंकूगु विवादयात कयाः थःपिनिगु गम्भिर ध्यानाकर्षण जूगु खँ न्ह्यथंगु दु । मोर्चाया केन्द्र व येँ जिल्ला समितिपाखें छगू मंकाः विज्ञप्ती जारी यासें राष्ट्रिय गौरवया आयोजनाया रुपय् फास्ट ट्र््याक दयेकेगु व उकिया जीरो प्वाइन्टया रुपय् यलया ख्वनाया दयेकेत सेनायात जिम्मा बिउगु व थौंकन्हय् उगु परियोजनाया निंतिं ख्वनाय् जग्गा अधिग्रहण यायेगु ज्या न्ह्यानाच्वंगुलिइ उकिं सेना व स्थानीयवासी दथुइ ब्वलंगु असन्तोष व विवादयात कयाः थःपिनिगु ध्यानाकर्षण जूगु खँ धयातःगु दु । स्वनिगःया पुरातात्विक महत्वं जाःगु ऐतिहासिक व सांस्कृतिक सहर ख्वनाया संरक्षण, संवद्र्धन व विकास नं सांस्कृतिक धंगं यायेमाः धासें मखुसा थुकिया ऐतिहासिकतायात लिच्वः लाइकथंया विकासया नामय् गलत संरचना निर्माण याये मजिउगु विज्ञप्तीइ धयातःगु दु । ‘युनेस्कोया प्रावधानकथं पुरातात्विक व ऐतिहासिक सहरय् छुं कथंया नं संरचना निर्माण यायेबलय् पालना यायेमाःगु सर्त कार्यान्वयन यायेमाः नापं ख्वनाय् नं फास्ट ट्र््याकया जीरो प्वाइन्ट दयेकेगु इलय् नं दक्वं पक्षयात ध्यान बीमाः’, विज्ञप्तीइ धयातःगु दु ।

सरकारं फास्ट ट्र््याकया लँ चायेकेगु नामय् सेनाया शिविर तकं खडा यानाः जबरजस्ती यायेगु व जनताया विरोधयात क्वत्यलाः मूर्खतापूर्ण व्यवहार याःगु धासें अज्याःगु ज्या मयायेत ख्याच्वः बिसें लिपा थुकिं ब्वलनीगु लिच्वःया जवाफदेही व जिम्मेवारी स्वयम सरकारया जुइगु विज्ञप्तीइ न्ह्यथनातःगु दु । सरकारं संरचना निर्माण याये न्ह्यः जनताया सः न्यनेगु व युनेस्कोया मापदण्ड पालना यायेमाः धासें जनताया सरकार धयाच्वंपिंसं सम्बन्धित थासय् च्वंपिं जनतायात सुविधा बीगु, ऐतिहासिक सम्पदा संरक्षण नापं जनताया अधिकार संरक्षण व स्थापित यायेमाःगु मोर्चाया धापू दु । विकासया नामय् भूमाफियातय्ततपाखें कमिसन कायेगु जक उद्देश् ज्वनाः पुर्खाया धरोहर नष्ट यायेत स्वःगु धासें थुगु योजनापाखें स्वनिगलय् हाकनं थप मनू दुकायेगु चाल जक जूगु मोर्चाया निष्कर्ष दु । अथे हे विज्ञप्तीइ स्वनिगलय् थौंकन्हय् चकंगु थाय् मदया वंगु, त्वनेगु लः, मतया अभाव, फोहर, धू, कुँया समस्या जुयाच्वंगु अवस्थाय् आः बाहिरी चक्रपथ, स्याटेलाइट सहरया आवश्यकता मदुगु नं स्पष्ट यानातःगु दु ।