आः मनपाय् अनलाइनं मुद्दा दर्ता याये फइगु

येँ – येँ महानगरपालिकाय् आः सुयां विरुद्ध छुं मुद्दा वा उजुरी बी माःगु दुसा नगरपालिका थ्यंक वयाच्वने म्वाःलीगु जूगु दु । अज्याःगु मुद्दा आः अनलाइन मार्फत बी फइगु व्यवस्था यायेत्यंगु दु ।
महानगरपालिकाया सेवायात धमाधम ‘स्मार्ट’ यायां यंकेगु झ्वलय् आः मुद्दा दर्ताया ज्या अनलाइन मार्फत यायेगु व्यवस्था जुइत्यंगु खः ।

थ्वहे वइगु असोज १ गते येँ मनपाया मेट्रो एफएमया बुन्हिया लसताय् जुइगु ज्याझ्वलय् मुद्दा दर्ता सम्बन्धी थ्व अनलाइन सेवाया नं उलेज्या याइगु ग्वसाः दु । थ्व सेवा सुचारु जुइवं नगर–वासीयात मनपाया ज्याकुथी थ्यंक वयाः मुद्दा दर्ता यानाच्वने माली मखु ।

थ्व सेवापाखें मुद्दा दर्ता यायेगु लिसें पेशी बुझे यायेगु सुविधा तकं काये फइगु खँ धाःगु दु । मुद्दायात कयाः जुइगु वहस, सुनुवाई सम्बन्धी ज्या जुइबलय् धाःसा सेवाग्राही ज्याकुथी हे वये माली । अथे खःसां आः थ्व सेवा शुरु जुइधुंकल कि लिपा वनाः वहस सुुनुवाईया ज्या नं भिडियो मार्फत अनलाइन हे याये फइगु खँ धाःगु दु ।

थौंकन्हय् सर्वोच्च अदालतय् नं अनलाइनपाखें मुद्दा दर्ता व वहस यायेगु सुविधा बीधुंकूगु दु । येँ महानगरपालिकां थगुनेनिसें मनपाय् कर पुलेगु ज्या अनलाइनं याये फइगु व्यवस्था याःगु खः । व स्वयां न्ह्यः छेँ दनेत माःगु नक्सा पास यायेगु ज्या अनलाइनं याये फइगु व्यवस्था याःगु खः ।

येँ महानगरपालिकायात स्मार्ट सिटी दयेकेगु झ्वलय् थुकथंया ज्याखँत न्ह्याका यंकाच्वंगु खः । स्मार्ट सिटी जुइत नगरया सेवा सुविधात अनलाइन मार्फत सञ्चालन जुइमाःगु, ई–गभर्मेन्स सम्बन्धी प्रावधानत पालना याये माःगु प्रावधान दु ।