युरोप आः कोरोनाया केन्द्रविन्दु

एजेन्सी- विश्व स्वास्थ्य संगठन (डब्ल्युएचओं) कोरोना भाइरस विश्वब्यापी महामारीया केन्द्रविन्दू आः युरोप जूगु खँ धाःगु दु । डब्ल्युएचओया महानिर्देशक टेड्रोस एड्हानोम गेहब्रेयससं विश्वन्यंकंया देय्तय्त आक्रमक पलाः न्ह्याकेत, सामुदाययात परिचालन यायेत व मनूत सिके मबीत मनूतय् दथुइ दूरी कायम यायेत धाःगु दु ।

‘युरोप आः विश्वब्यापी महामारीया केन्द्र विन्दु जुयाच्वंगु दु । चीनबाहेक मेगु फुक्कं देशय् सीपिं व संक्रमणया घटना स्वयां अप्वः युरोपय् खनेदुगु दु’ वय्कलं धयादीगु दु । चीनय् महामारी उत्कर्षय् थ्यनाच्वंगु इलय् स्वयां अप्वः घटना युरोपय् आः न्हियान्हिथं खने दयाच्वंगु दु’ वय्कलं तथ्यांक न्ह्यब्वसें धयादीगु दु ।

‘थ्व मि च्याके मबिइ’ वय्कलं धयादीगु दु । तःगू हे युरोपेली देशय् कोरोनाभाइरस संक्रमण जुइगु सीपिं मनूतय् ल्याः न्ह्यथनेबह कथं अप्वया वनाच्वंगु इलय् महानिर्देशक टेड्रोसया थ्व धापु वःगु खः । इटलीइ शुक्रवाः जक दकलय् अप्वः २५० म्हेसिया ज्यान वंगु खः । आः अन १२६६ म्हेसिया ज्यान वनेधुंकूगु दुसा १७,६६० म्हेसित संक्रमण जूगु पुष्टि जूगु दु । इटली धुंकाः स्पेनय् बांमलाक प्रभावित जूगु दु ।

थन शुक्रवाः सीपिनि ल्याः ५० प्रतिशतं अप्वया १२० म्ह थ्यंगु दुसा संक्रमित जूपिनि ल्याः ४,२३१ म्ह थ्यंगु दु । प्रधानमन्त्री पेद्रो सान्चेजं शनिवाः निसें निवाःया निंतिं लागु जुइकथं सतर्कता अवस्था कायम यायेगु घोषणा यायेधुंकूगु दु । वंगु डिसेम्बरय् चीनं न्यनेगु सुरु जूगु कोरोनाभाइरस संक्रमण आः विश्वन्यंकं खनेदयेधुंकूगु दु । विश्व स्वास्थ्य संगठनया कथं विश्वया १२९ गू देय्या हजारौं मनूत कोरोना भाइरसं संक्रमित जूगु दुसा सीपिनि ल्याः न्याद्वलं अप्वयेधुंकूगु दु । थ्व ल्याःयात डब्ल्युएचओया महानिर्देशक ट्रेडसं ‘छगू दुःखद् माइलस्टोन’ कथं व्याख्या याःगु दु ।

स्पेन व इटलीइ संक्रमिततय् ल्याः अप्वया च्वंबलय् फ्रान्सय् नं २८७६ म्हेसिके संक्रमण खनेदयेधुंकूगु दुसा ७९ म्हेसिया ज्यान वनेधुंकूगु दु । अथेहे जर्मनीइ ३०६२ म्हेसि संक्रमण खनेदुगु दुसा न्याम्हेसिया ज्यान वंगु दु । बेलायतय् ७९८ म्हेसिके संक्रमण खनेदुगु दुसा ११ म्हेसिया ज्यान वनेधुंकूगु दु ।

छु यानाच्वंगु दु युरोपेली देशं ?
देशब्यापी सतर्कताया घोषणा यासें स्पेनी प्रधानमन्त्री सान्चेजं नागरिकतय् स्वास्थ्य रक्षाया अझ बांलाक यायेत सरकारं राज्यया फुक्कं स्रोत साधन परिचालन यायेगु खँ धयादीगु दु । स्पेनय् मनूतय्त वये वने यायेगु सीमित यायेगु, उद्धारया निर्देशन बीगु, गुलिखे थासय् पहुँच मदयेकेगु व उद्योगय् १५ न्हु तक हस्तक्षेप यायेदइगु अधिकार बिउगु दु ।

इटलीइ देशब्यापी ‘लकडउान’ अर्थात छेँय् नं पिहां वयेमदइगु व लँय् जुइत प्रतिबन्ध तयेधुंकूगु दु । थ्व बाहेक डेनमाकं शनिवाः निसें विदेशीतय् निंतिं सीमा बन्द याःगु दु । चेक गणतन्त्रय् नं मेगु देय्या नागरिकयात प्रवेश रोक व थःगु देय्या नागरिकतय्त नं विदेश वनेत पनाबिउगु दु । अस्ट्रियां इटली जुयाः दुहां वइगु स्वंगुलिं नाका बन्द याःगु दु । युक्रेनं नं कुटनीतिज्ञत बाहेक मेपिनिगु निंतिं फुक्कं स्थल मार्गया सीमा निवाःया निंतिं बन्द याःगु दुसा हंगेरीइ नं अस्ट्रिया व स्लोभिनियालिसेया सीमा बन्द याःगु दु । पोल्यान्डं नं आइतवाः निसें फुक्कं विदेशीया निंतिं सीमा बन्द याःगु दु ।

बेल्जियम, फ्रान्स, स्वीट्जरल्यान्ड व जर्मनीया गुलिखे थासय् स्कुल बन्द यायेधुंकूगु दुसा तःधंगु भेला यायेत प्रतिबन्ध तयेगु लिसें सिनेमा हल, रेष्टुराँ, बार वनेत नं कडा याःगु दु ।

पेरिसय् च्वंगु विश्वप्रसिद्ध लुभ्र संग्रहालय नं शुक्रवाः निसें बन्द यायेगु घोषणा याःगु दुसा पर्यटकतय् निंतिं आइफल टावर नं बन्द याःगु दु ।

मेमेथाय् छु यानाच्वन ?
अमेरिकाय् कोरोनाया संक्रमण प्रकोप न्यनावंगु धासें नियन्त्रण यायते राष्ट्रिय संकटकाल घोषणा यायेधुंकूगु दु ।
पाकिस्तानं नं फुक्क स्थलसीमा बन्द यायेत्यंगु दुसा १५ न्हुया निंतिं अन्तर्राष्ट्रिय हवाइ उडानयात सीमित यायेगु खँ विदेशमन्त्रीं धाःगु दु । भारतय् नं कोरोना संक्रमणं निम्हेसिया ज्यान वनेधुंकूगु दु । भारतं शुक्रवाः निसें फुक्क कथंया भिसा स्थगित यायेधुंकूगु दुसा भारत दुहां वयेदुपिंसं नं १४ न्हु क्वारेन्टाइनय् च्वनेमाःगु व्यवस्था याःगु दु ।
क्यानाडाय् सांसदतय्सं संसद् स्थगित यायेगु पक्षय् मतदान याःगु दु । थनया प्रधानमन्त्री जस्टिन ट्रुडो थः कलाःयात संक्रमण खनेदयेवं १४ न्हुया निंतिं अलग हे च्वनेगु यायेधुंकूगु दु । न्यूजिल्यान्डया प्रधानमन्त्रीं आइतवाः चान्हय् लिपा न्यूजिल्यान्ड दुहां वंपिं मनूतय्त अलग्ग हे च्वनेत इनाप यानादीगु दु ।