ने. सं. ११४४ चौलाथ्व दशमी -

ओली सरकार असफल हे खः

नेपाली संकिपाख्यःया कलाकःमि, छगू इलय् तसकं लोकंह्वाःम्ह-नांजाःम्ह हिरोनि गौरी मल्लया धापू कथं नेपाःया इतिहासय् दकलय् ‘फेलर’ सरकार हे ओली सरकार हँ । थ्व खँ छगू टेलिभिजनया अन्तर्वार्ताय् धाःगु खः । थ्व देशय् सरकार दु धकाः धायेगु हे मछालापुसेच्वं धयागु वय्कःया धापू दु। देशय् मिसाम्ह राष्ट्रपति जुयाच्वंगु दु, तर मिस्तय् निंतिं सिन्का छपु नं त्वःथुगु मदु धयागु मल्लया भनाइ खः । अथे ला हिरोनि गौरी मल्लया जक थज्याःगु धारणा वयाच्वंगु मखु, नागरिक समाज, सेलिब्रिटी, कलाकःमि, बुद्धिजीवीत लिसें अप्वः धयाथें मिडियाया नं थज्याःगु हे धारणा खने दयाच्वंगु दु वर्तमान सरकारया बारे । नेकपा दलया नेता-कार्यकर्ता व आसेपासेतय्सं बाहेक आमनागरिक अले नेकपाया गुलिखे नेता सांसदतय्सं तकं ओली सरकारया आलोचना, विरोध यायेगु यानाच्वंगु खनेदु। प्रधानमन्त्रीया न्हिप्यं ज्वनाः थःगु स्वार्थ पूर्ति यानाच्वंपि लम्पट नेता, कार्यकर्ता व सल्लाहकारतय्सं प्रधानमन्त्री ओलीयात गुमराह यानाच्वंगु दु धकाः नं धाइ ।

अथेला ओली बाःया धापूकथ कोरोना कहरं यानाः देशय् चौतर्फि विकास याये मफुत हँ । तर कोरोना ओली सरकार गठनया निदँ लिपा तिनि खनेदुगु खः । निदँ तक छु कारणं चौतर्फि विकास याये मफुत ले धकाः आमनागरिकतय्सं न्ह्यसः तयाच्वंगु दु। धायेत ला केपी ओलीया सरकार आःतकया दकलय् शक्तिशाली सरकार धकाः धाइ, अले ओली बाःयात नं देय्या दकलय् शक्तिशाली प्रधानमन्त्री धकाः धाइ ।

तर प्रधानमन्त्री शक्तिशाली जूसां ज्या धाःसा अशक्त । गुकिं यानाः देय् नापं अशक्त जुलसा ओली सरकारयात आःतकया दकलय् ‘फेलर’ सरकार धइगु दाग नं लात । थ्व दाग ओली बाःया कपालय् हे तिकाबिल धाःसां जिउ । अथे ला देशय् अझ बिदेशय् महामारी कथं न्यनाच्वंगु कोरोनाया कहरयात नियन्त्रणया लागि थ्व सरकारं उलि ज्या याये मफु धइगु नं आमनागरिकतय् धापू दु । थ्व हे कारणं सरकारया तच्वःगु आलोचना जुयाच्वंगु दु। ओली सरकारं कोरोना नियन्त्रणया लागि ठोस योजना हये मफुगुलिं कोरोना संक्रमण झन्झन् अप्वया वनाच्वंगुयात कयाः नं सरकारया आलोचना जुल । कोरोना नियन्त्रणया लागि इलय् हे ठोस योजना दयेकाः सम्पूर्ण सरकारी संयन्त्रयात चलायमान यानाः ज्या मयाःगु कारणं कोरोना अनियन्त्रित जूगु व कोरोनां यानाः ज्यान छ्वयेमाःपिं अप्वया वयाच्वंगु खः धाःसां जिउ ।

कोरोना नियन्त्रण धकाः देय्या अर्बौ अर्ब दां खर्च जूसां आम नागरिकतय् लागि ‘हात्ती आयो हात्ती आयो फुस्सा’ धाःथें जक जुल । कोरोनाया ल्वचं कयाः मृत्यु जूपिनि ल्याः अप्वया च्वंगु खनेदुसा कोरोनां यानाः देय्या अर्थतन्त्र हे डाँवाडोल जुयाच्वंगु दु। आमनागरिकत रोग व भोकं पीडित, बेरोजगार जुयाच्वंगु दु। थज्याःगु इलय् प्रधानमन्त्री, सरकार, सांसद, नेता व लम्पट कार्यकर्ता राजनीतिक दलत सकलें छप्पँ जुयाः थ्व संकटया पार यायेमाःगु खः । तर स्वयम् प्रधानमन्त्रीया सत्तारुढ दल दुने हे विवाद जुयाच्वंगु दु । थ्व विवाद कोरोना गुकथं नियन्त्रण यायेगु धयागु खँय् मखु, पद व पावरया निंतिं जुयाच्वंगु दु। पद कायेत नेतातय् दथुइ गुटबन्दी जुयाच्वंगु दु, अले गुट गुट दथुइ कचवं पिकयाच्वंगु दु ।

सरकारं हे आकस्मिक बाहेक शल्यक्रिया यायेमाःगु उपचारयात दिकेगु निर्णय यानाबिउगु दु । अथे जूबलय् यक्व विरामीत थःगु ल्वय् घानाः म्वानाच्वनेमाःगु दु । देय्या थज्याःगु भयावह स्थिति स्वयेबलय् न्ह्याम्हेसिनं याउँक हे धायेफु कि ओली सरकार असफल जूगु दु ।

नेकपाया शक्तिशाली नेता व दलया अध्यक्ष प्रधानमन्त्री केपी ओलीं थःगु दलया नेतातय्त छपु हे सुकाय् माः हनातये मफुत, थ्व ओलीबाःया
कमजोरी खःसा देय्या निंतिं विडम्बना । प्रधानमन्त्री शक्तिशाली जूसां प्रधानमन्त्रीयात वय्कःया हे आसेपासे चाकरीबाज चाप्लुसीबाज सल्लाहकारतय्सं सत्य तथ्य जानकारी, उचित सर सल्लाह मबिसे थःथःगु स्वार्थ जक पूवंकेगु ज्या यानाच्वंगु कारणं नं थज्याःगु अबस्था वःगु खः धायेत लिफः स्वयेमाःगु मदु। अथेला गुलिसिया धापू कथं प्रधानमन्त्रीया स्वास्थ्यया कारणं नं प्रभाबशाली कथं ज्या याये मफुगु खः । स्वास्थ्य बांमलाःगु कारणं प्रधानमन्त्रीं आसेपासे भरौटेतय् भरोसाय् ज्या याये मालाच्वंगु कारणं नं देशय् थज्याःगु स्थिति ब्वलंगु धइगु नं आम नागरिकतय् धापू खनेदु ।

अथे ला नेकपाया सामान्य नेता कार्यकर्तानिसें स्वयम प्रधानमन्त्री, मन्त्री सांसदतय्के घमण्ड अप्वयाच्वन धकाः नं आम नागरिकतय्सं वाः चायेकाच्वंगु दु। छुं ई न्ह्यः प्राइम टेलिभिजनया पत्रकार ऋषि धमलाया ‘जनता जान्न चाहन्छ’ ज्याझ्वलय् नेता ईश्वर पोखरेलं पत्रकार धमलायात स्तर मदुम्ह पत्रकार धकाः थर्के यात, अले अन्तर्वार्ताया झ्वलय् थःथाय् छेँय् ज्या याइम्हेसित ब्वःबी थें यानाः ब्वः बिउगुयात कयाः नं नेकपाया नेतातय्के तसकं घमण्ड बढे जुयाच्वन धकाः नं आमनागरिकतय्त अनुभव जुयावःगु दु । अथे हे मेगु छगू अन्तर्वार्ताय् पत्रकार ऋषि धमलायात पर्यटनमन्त्री योगेश भट्टराइनं अथेहे थर्के याःगुयात कयाः नं योगेश भट्टराईया ओलोचना जूगु खः । देशय् सरकार अबले सफल जुइ गुबलय् आम नागरिकतय् दैनिकी जनजीविका चले यायेत अति आवश्यक सरसामानत गथेकि – लः, खाद्यान्न, स्वस्थ्य, शिक्षा, रोजगार, यातायात आदि थें ज्याःगुली आम नागरिकतय् पहुँच सर्वसुलभकथं आम नागरिकतय् दथुइ थ्यंके फइ अले जक सरकारयात सफल धाइ ।

तर थ्व इलय् सरकार पूर्ण रुपं असफल जूगु दु । कोरोना महामारीया दथुइ यक्वसिनं थःगु रोजगारी गुमे यायेमाःगु दु । गुकिं यानाः नयेत्वनेगु, च्वनेगु समस्या वयाच्वंगु दु। गरिबत लँय् लँय् वयाः फ्वनाः नयेमाःगु अवस्थाय् दु । थुकिया दसि ला रत्नपार्क लिसें थीथी थासय् सितिकं नकीथाय् नःवःपिनि हुलं हे क्यनाच्वंगु दु । आमनागरिकयात माःगु स्वास्थ्य सेवा ला भ्याः भचा हे मदयेधुंकल धाःसां जिउ । संविधानं हे महामारीया इलय् निःशुल्क उपचार यायेमाः धयातःसां सरकारं कोरोनाया परीक्षण तकं ध्यबा कयाः यायेगु निर्णय यानाः थःपिं गुलि तक अकर्मण्य धकाः क्यनाबिउगु दु । थुकिं यानाः ध्यबा मदुपिं नागरिक कोरोना संक्रमण हे जूसां परीक्षण तकं याके मफयाच्वंगु दु, उपचारया ला खँ हे त्वःते । परीक्षण यानाः संक्रमण खनेदुपिं तकं अस्पतालय् उपचार याके मफयाच्वंगु दु। थ्व ला जुल कोरोनाया खँ, कोरोना बाहेक मेमेगु ल्वय्या उपचार ला सरकार थम्हं हे ठप्प धयाथें यानाबिउगु दु। सरकारं हे आकस्मिक बाहेक शल्यक्रिया यायेमाःगु उपचारयात दिकेगु निर्णय यानाबिउगु दु। अथे जूबलय् यक्व विरामीत थःगु ल्वय् घानाः म्वानाच्वनेमाःगु दु । देय्या थज्याःगु भयावह स्थिति स्वयेबलय् न्ह्याम्हेसिनं याउँक हे धायेफु कि ओली सरकार असफल जूगु दु। थुकी छुं शंका यायेमाःगु आवश्यक मदु ।