सार्वजनिक विदा अध्ययन यायेत समित

येँ (नेपालभाषा टाइम्स) – सरकारं वालय् निन्हु विदा बीगु सुरु यायेधुंकाः आः सार्वजनिक विदा क्वपालेगु यायेगु तयारी याःगु दु । थुकिया निंतिं सार्वजनिक विदा पुनरावलोकन कार्यदल गठन याःगु दु । वालय् निन्हु शनिवाः व आइतवाः विदा बीगु ज्यां सेवा प्रवाह व सरकारी ज्याय् लाःगु लिच्वःयात ध्यानय् तयाः दछिया दुने बीगु सार्वजनिक विदा परिमार्जन यायेगु निंतिं कार्यदल गठन याःगु खः ।

सोमवाः च्वंगु सचिवतय् बैठकं कार्यदल दयेकेगु निर्णय याःगु खः । सरकारं गोविन्दबहादुर कार्कीयात मुख्यसचिव नियुक्त यायेधुंकाः न्हापांखुसी सचिवतय् बैठक च्वंगु खः । बैठकं गृहमन्त्रालयया सहसचिवया संयोजकत्वय् सार्वजनिक विदा पुनरावलोकनया निंतिं कार्यदल दयेकेगु निर्णय याःगु खँ मुख्यसचिव कार्कीं छपु विज्ञप्ति पिथँसें जानकारी बियादीगु दु । कार्यदलय् प्रधानमन्त्री तथा मन्त्रिपरिषद् ज्याकू, भूमि व्यवस्था, सहकारी, संघीय मामिला तथा सामान्य प्रशासन मन्त्रालय व अर्थ मन्त्रालयया प्रतिनिधि दइगु खँ धाःगु दु । कार्यदलयात झिंन्यान्हु दुने गृह मन्त्रालयय् प्रतिवेदन बीत कार्यादेश बिउगु दु ।