लखुतीर्थय् लुँ बाः वः धाइ
प्राणमाया महर्जन (७९ दँ, देक्व, तपिंताँ)
जिगु जन्म येँया देक्वः (तपिंताँँ) त्वालय् जूगु खः । न्हापा थन छेँ हे मदु धाःसां जिउ । जिमि छेँ छखा जक खुसिया न्ह्यःने लाः । थौंकन्हय्या तपिंताँया क्वसं छबालाचा लँपु । क्वसं विष्णुमती खुसि कलकल न्ह्यानाच्वंगु उकिया नापसं जिमि बुँ । निपी बुँया दथुइ आँय्पा पौया छेँ । निद्या दुगु छेँ । छेँया क्वसं खले (वा पायेगु थाय्) दयेकातःगु ।
छचालं बखतया तरकारि बालि याइगु । छेँ क्वय् तरकारि पसः दु । बालि यक्व दु । उकिं किलागलंनिसें धिमय्ल्वहं तक जिमिसं तरकारि तः वनेगु । अनया पसः पतिकं जिमिगु तरकारि थ्यं । चिकिचा बाला जूसां थनं उखेंथुखें जुइपिं यक्व दु । त्रिशुली, मनकामना जुजुं भिंनुंगा वनीपिंतक थनं वं । अझ सिँ कुबियाः मिउ वइपिं ग्वाः ग्वाः दु ।
इमिसं तकं जिमि पसलं तरकारि ज्वना वनी । दकलय् आपाः तरकारि ला इमिसं हे ज्वना वनी । छकः वइबलय् भारि भारि तरकारि यंकी ।
न्हापा तपिंताँ छपु दु । मेगु ताँ मदु । यातायाता ताँ (झोलुंगे पुल) नं लिपा तिनि दयेकूगु । पारी वनेत भचा थाकु । सुन्ति वल कि खुसिइ की तानाः सिँपौया ताँ दयेकी । थुकिं हे पारी वनीगु ।
छबालाचा जुइत हे ग्यानापुसे च्वं । खुसि नं तब्या । खुसिबाः वयाः तरकारि बालि नं चुइका यंकेयः । वि.सं. २०२८ सालपाखे खुसिबाः वयाः छेँया स्वाहाने बापुतक त्वःधुल । छेरिइ च्वंगु कुति उगः दक्वं चुइकल । न्हापाया छेँ तसकं बल्लाः । ९० सालया तःभुखाय् ब्वलं नं जिमि छेँ मदुं तःभुखाय् ब्वःबलय् जिमि तःमां (बाःया न्हापांम्ह कलाः) भुतुलिइ ज्वरे यानाच्वंगु हँ ! छेँ ला मदुं ।
तःमां व निम्ह मस्त अन हे सिनाच्वन हँ ! तर तमांया मां मसी । अनं लिपा जिमि मांनाप ब्याहा याःगु ।न्हापा ज्यां तसकं थाकु । न्ह्यलं चालकि वा सुइगु, बजि ल्हुइगु । गुलि बजे जुल धकाः धाये मसः । अय्नं मां–अजिपिंसं सर्गतय् नगु स्वइगु । इमिसं नगु गन थ्यन व स्वयाः छता जुल, निता जुल धाइगु ।
जिमि छेँय् न्हापा बन्दुक ज्वनाः खू वयेयः । थन च्वसं मुग्लानय् च्वंपिं थेंज्याःपिं खुँया सरदार दु । उकिं लिबाः न्ह्यबाः जुइ ग्यानापुसे च्वं । जिमि छेँय् खुं बरोबर दुःख बिउ ।
सुथ जुलकि तोप नं तया हइ । तोप तया हइबलय् ज्या बछि क्वचाये धुंकी । अबलय् विष्णुमति खुसिइ सिंहन्या वाइँवाइँ दु । न्यात थहां थहां वयाच्वनी । ब्वहत सर्गतय् उखेंथुखें चाःहिलाच्वनी । प्वःतसें दुछि दुछि न्या लाः वइ । इमिसं प्वःप्वः न्या ज्वनावनी । लखुतीर्थय् नं न्या यक्व दु । अन ला झन् लुँ बाः वः धाइ ! जिमि बुँइ च्वय् च्वय् थ्यंक न्या वः ।
न्यात फाताफाता पुलाच्वनी । कात्तिक–मंसिर महिनाय् ला झन् न्या वा गाइगु । सर्गतं न्या कुतुं वइगु । न्यात उखेंथुखें फाताफाता पुला जुइगु । जिमिसं न्या वा गाःबलय् यक्व लानाः काये लं । थौंकन्हय् रंगशाला दयेकूथाय् न्हापा तिनिख्यः हे धाइगु । अन जिमि पाजुपिं दु । स्वन्तिया इलय् अन वनेगु । अन ला झन लँ धुछिं न्या दु ।
न्या वा गाइबलय् छचाःलं न्यात तिंतिं न्हुयाः कुतुं वइगु ।न्हापा खुसि दथुइ सीम्ह उइपिं नं दु । ग्यानापु धाइ । तर न्ह्याबलें थन हे च्वनेगुलिं ग्याः थें नं मच्वं । तर थन ताहाः धाःसा यक्व दु । थन भूतनाग दु धाइ । उकिं बौ तयेमाः । पि हयेमाः । कँय्ताहिति क्वय् वयेथाय् स्वंगः छ्यं दुम्ह नाग दु धाइ । तर जिं मखं ।
न्हापा बिजुली मत मदु । तुकि मत च्याकेगु । तुकि मत च्याकेत मचिकं काः वनेगु । लाइन च्वनाः मचिकं कायेमाः । न्यागः धिबा व सिसिचा छगः बियाछ्वइ । बामनाति मचिकं बिया हइ । जिमि चि, चिकं व मचिकं जक न्याःसा गाः । मेगु दक्वं बालि वइगुलिं गाः । भुतुलिइ जा थुइगु । बुँइ च्वंगु सिमाकचा ध्यनाः च्याकेगु । थनं झ्वःझ्वः सा ज्वये यंकी ।
साया गोबर लँ धुछिं दइ । दक्व मुनाः सप्पा दयेकाः तयेगु । व च्याकाः नं जा थुया । नांनांकथंया तरकारि नयेम्वाः । बखतया तरिकारि जक जुइ । नखःचखःबलय् नं बूबः यक्व नयेम्वाः । चिग्वः कय्गू छता दयाच्वनी । ला छधानीया नितकांनिसें जिं सिउ । खा लहिना तइ । तर खाया ला नइमखु । ख्यें नयेगु चलन नं मदु । धिबा थिके ।
उकिं ख्यें मी यंकी । नखः वलकि खा स्यानाः नइ । खाया ला न्यानाः नइमखु । भ्वय् वने त्यंसा भान्तां लं पुनाः वनेगु । इहि याःसां तिसा तिइकीमखु । सुता छपु क्वखायेकी । ब्याहा जूसा लुँस्वां तिइकी । जिं काउलि मियाः स्वीतकाया चकंछि लुँ न्यानाः तुकिचा दयेका । जितः मचाबलय् मार्चाः तयेकातःगु खुयायंकल ।
उकिं लिपा छतोलाया १९० तका दां पुलाः मेगु मार्चाः दयेकाबिल । जिमि छेँय् न्हापा बन्दुक ज्वनाः खू वयेयः । थन च्वसं मुग्लानय् च्वंपिं थेंज्याःपिं खुँया सरदार दु । उकिं लिबाः न्ह्यबाः जुइ ग्यानापुसे च्वं । जिमि छेँय् खुं बरोबर दुःख बिउ ।बुँइ लाक्वपाक्व साः तइमखु । कं काः वनेमाः । जिमि कं काः वनेत बरखानी (स्वयम्भू क्वय्) वनेमाः । .
कं कायेत गाः म्हुम्हुं कुहां वनेगु च्वय्या चा कुतुं वइ धकाः । सु तानाः पंया की तयाः मिजंत कुहां वनी । बल्लाःपिं, मग्याःपिं मिसापिं नं वं । जि नं वना । थहां वयेबलय् धाःसा भचा थाकु । कका, दाजुपिंसं घ्वानाः बल बियाः थकाइ । मिजंत प्यपां चुयाः थहां वयेफु । कं कायेत गाः म्हुइबलय् च्वं लः वयाच्वनी । कं कायेथाय् लः वइमखु ।
LEAVE YOUR COMMENTS