ने. सं. ११४६ दिल्लाथ्व सप्तमी -

ख्यालः कासाय् उत्कृष्ट जूगु पुचःयात हना

ख्वप (नेपालभाषा टाइम्स) – थगुने गुंपुन्हिया झ्वलय् न्ह्यब्वःगु ख्यालः व पुचःयात हनेज्या याःगु दु । थगुने गुंपुन्हिया लसताय् न्ह्यब्वःगु ख्यालःमध्ये उत्कृष्ट जूगु ख्यालः व पुचःयात हनेज्या याःगु खः ।

नेपाल मजदुर किसान पार्टीया केन्द्रीय दुजःलिसें ख्वप नगरपालिका ७ या वडानायः उकेश कवां उत्कृष्ट ख्यालः व ख्यालः न्ह्यब्वःगु पुचःयात हनेज्या यानादीगु खः । थगुने गुंपुन्हिया इलय् न्ह्यब्वःगु व उत्कृष्ट जुइत ताःलाःगु ‘मखुथे जुल’ नांया ख्यालःया च्वमि, स्यनामि व ख्यालःम्वः रवि ख्याजु नापं कृष्ण प्रजापतियात हनापौ देछासे हनेज्या याःगु खः । ज्याझ्वलय् ख्यालः न्ह्यब्वःगु संस्था नेपाल क्रान्तिकारी सांस्कृतिक संघ ७ वडा समितिपाखें ढलोछया गणेद्यः छम्ह छम्ह द्वहलपाकथं लःल्हाःगु खः ।

ज्याझ्वलय् नवासें वडाअध्यक्ष कवां गरिब जनता व देय्यात ध्यानय् तयाः साहित्यकार, च्वमिपिंसं थःपिनिगु च्वसा न्ह्याकेमाः धयादिल । ख्वपया बहुआमिक व्यक्तित्व रामशेखर नकःमिं ख्यालः विधायात च्वन्ह्याकूगु इलय् थौंकन्हय् चर्चित जुयाच्वंपिं मनोज गजुरेल लगायतया कलाकार बू हे मबूनिगु वय्कलं कनादिल ।

साहित्यकार नाति कवां चुक, चुकय् व त्वाः त्वालय् न्हापा क्यनीगु पूधाःप्याखं, पर्दाय् क्यनीगु प्याखं व ख्यालकं देय्या राजनीतिइ हिउपाःया निंतिं तःधंगु भूमिका म्हितूगु व योगदान बिउगु खँ कनादिसें उकियात न्हू पुस्तां नं बांलाक अनुशरण याना वनेमाःगु खँय् बः बियादिल ।

नेक्रासां संघ ७ वडाया अध्यक्ष लक्ष्मण ताचामोया सभापतित्वय् जूगु ज्याझ्वलय् नारायणप्रसाद मचामसिं लसकुस यानादीगु खः । ज्याझ्वलय् ख्यालः च्वमि ख्याजु, रामप्रसाद कवां, कविता मचामसि लगायतं नुगःखँ तयादीगु खः ।