देय् ख्याः यायेगु लासा मखु !
निम्ह नेता । प्रम ओली व भू.पू प्रम माधव नेपाल । इमि दथुइ कठोर वाक युद्ध जुइ । भनाभन । कटु संवादया वमन याइ । मत्ती लुइ । देय्या वरिष्ठ नेता धाःपिं । थःत देय्या केन्द्र खंकीपिं । खिचा ल्वाःथें ल्वाइ । छम्हं मेम्हेसित ‘ह्वाउ ! ह्वाउ !’ याइ । फयां फक्व तसकं । देय् हे थ्वक्क । जनताया नुगलय् हे दिक्क ।
देशय् हिउपाः मवःतले । जनतां म्हगस खंकी । म्हंकी । देशय् हिउपाः वइ । परिवर्तन जुइ । आः जनता गरिबी, दरिद्रता, शोषणं मुक्त जुइ । सामाजिक विभेदया अन्त्य जुइ । देशवासीतय्सं समानताया उपभोग याये खनी । खः । देशय् हिउपाः वइ । असंख्य जनतां थःगु जीवन दान बी । शहादत प्राप्त याइ । न्हूगु दिन वइ । जनता लसतां मस्त जुइ । तर । थौं थौं कन्हय् कन्हय् धाधां दँ दँ विना वनी । फुइ । जनतां खंगु सुखद म्हगस पूवनीमखु। जनतां आशां द्याःगु अनुभव याइ ।
थौं देय् सीमित छगू वर्ग, पुचःया थःथःगु शक्ति, सुख, सुविधाया निंतिं ल्वायेगु अखडा जुयाबी । गय् यानाः शक्तिइ वये । शक्ति जमे याये । शक्तिया लिधंसाय् फक्व धन सम्पत्ति आर्जन याये । मोज याये ! नेतातय्सं पिनें आकर्षक नारा थ्वयेकी । जनपक्षीय सिद्धान्त न्ह्यब्वइ । तर । व्यवहारय् । देय् या राजनीति थौं शुन्य फसय् । आकाश आकाशं ब्वइ । देय् । थौं । छम्हू नेताया ल्हाती सीमित । जनता । द्वंतय् ल्वापु घाँय् थें । चुं दनी । सर्वसाधारण जनतां दुःख सी । पीडित जुइ ।
महान नेताद्वय । ओलीजु व माधवजु। इमि दथुइ छाय् भनाभन जूगु? कारण छु? जनताय् जिज्ञासा जुइ । जनताया सेवाया निंतिं प्रतिस्पर्धाया लागि ल्वापु जूगु खःला? अनुमान याये । देय्या महान नेताजुपिं ! इमि ल्वापु चिचिधंगु खँय्, व्यक्तिगत स्तरय् गथे जुइ ? जुइ हे फइमखु। महान नेतातय् ला चान्हिं चिउताः जुइ, चिन्ता जुइ । जनताया गथे यानाः सेवा याये ! गथे यानाः जनतायात सुख बी ! जनताया गरिबी, दरिद्रतां गथे यानाः मुक्ति बी ! गुकथं जनताया जीवनस्तर थकाये ! तर निम्ह महान नेता दथुइ जूगु भनाभनया स्तर तसकं हे व्यक्तिगत, क्वय् लाःगु खनेदइ । पारस्परिक कुण्ठा, असन्तोष, आक्रोशया नग्न अभिव्यक्ति थें खनेदइ । ल्वापु दुनेया खास रहस्य छु खः ? मसिउ । तर छ्यांग खने दुगु यथार्थ थ्व हे खनेदु। थ्व हे जुइ ।
मजाकया खँ । निन्हु लिपा । नेता माधवजुया वक्तव्य पिहां वइ । ‘ओलीजु व जिगु दथुइ जूगु भनाभन कलाःभाःतया दथुइ जूग सौहार्दपूर्ण ल्वापु थें जक खः । सामान्य घटना । चिधंगु मामुलि खँ । उकी पहाड खंकेमाःगु आवश्यकता मदु।’ माधवजुया स्पष्टिकरण न्यने । मत्ती वइ । प्रम ओलीजु जोक यायेगुलिइ निपुण धयां ला माधवजु जादू यायेगुलिइ तसकं हे माहिर खनिं ।
महान नेतातय् ला चान्हिं चिउताः जुइ, चिन्ता जुइ । जनताया गथे यानाः सेवा याये! गथे यानाः जनतायात सुख बी ! जनताया गरिबी, दरिद्रतां गथे यानाः मुक्ति बी ! गुकथं जनताया जीवनस्तर थकाये!
म्हिगःया इमि मल्लयुद्धया अखडायात माधवजुं ‘छू मन्तर’ यानाः गुकथं दम्पत्तिया ‘बेड सीन’य् हीकी । सकसितं आश्चार्यचकित यानाबी । माधवजुं धाइ, ‘ओली, जिगु दथुइ जूगु घोचपेच कलाःभाःत दथुइ जुइगु सामान्य डाइलग जक खः । जिपिं अनसं ल्वाय्, अनसं हे जाय् । तुफान थनेमाःगु आवश्यक मदु।’ वा ‘माधवजुं ग्यानापुगु रौद्ररसयात गुकथं कोमल श्रृंगाररसय् परिणत याइ ! च्वछायेबह जुइ । तनावग्रस्त राजनीतिक वृत्तय् पलस सां निभाः जलं खइ ।
धाइ । वास्तवय् नेताद्वय ओली व माधव दथुइ गुगु भनाभन शक्तिया युद्ध खः । छिनाभूति । लाकलुक यायेगु दाउ । जनतां विचाः याइ । ओली व माधवया ल्वापु। निम्हतिपूया ल्वापु थें क्वथां क्वथां जक सिधइगु खनेमदु। ख नं खः । थौंकन्हय् कलाःभाःतया दथुइ जुइगु द्वन्द्व, ल्वापुयात मामुलि, चीधं खंकेगु जमाना मखयेधुंकल । क्वथा दुने निम्हतिपूया दथुइ जुइगु घटनातसें तःधंगु हिंसाया रुप काः । काटरमार जू । भाःतं जबरजस्त यौन दुव्र्यवहारयात धकाः कलातं भाःतया लि· हे ध्यना बिउगु घटना नं क्वथा दुने जू । थौंकन्हय् निम्हतिपूया खाताय् नं कलाःभाःतया दथुइ शक्ति सन्तुलन कायम याये मफुतकि ततःधंगु आपराधिक घटना नं जू ।
अहंकारी निम्हतिपूया दथुया स्वापू सदां संकटग्रस्त जुइ । तनावग्रस्त जुइ । थौं सम्बन्ध विच्छेदया घटनात नं अप्वया वयाच्वंगु दु। उकिं निम्हतिपूया दथुया ल्वापु थें जक खंकाः ओलीजु व माधवजुया दथुइ जूगु भनाभन, कटु वाक्यया हानाहानयात फासांफुसुं यानाः छ्वये फइगु स्थिति दु ला ? निम्हतिपूया क्वथाय् जुइगु ल्वापु ख्यापुइ पिनेयापिंसं चिउताः तये मजिउ । हस्तक्षेप याये मजिउ । इपिं निम्हतिपूया व्यक्तिगत, निजी मामिलाया खँ जुइ । पुलांगु मान्यतां धाइ ।
तर थौं । थौं निम्हतिपूया क्वथा ल्वापुयात निजी जक खंकाः समाज, राज्यं थुकी मिखा तिसी मजिउ । क्वथा दुने निम्हतिपू दथुइ जुइगु शोषण, दमन, अन्याय, अत्याचारया खँ क्वथाय् जक सीमित याये मजिउ । पिने हयेमाः । व व्यक्तिगत, निजी जक मजुसे समाज, राज्यया सरोकारया विषय नं जुइ । अझ देशप्रति जिम्मवार दुपिं नेतातसें ‘जिमिगु ल्वापु निम्हतिपूया क्वथा दुनेया ल्वापु थें जक खः ।’ धकाः हलुका पारां देय व जनतायात गुमराह याये दइमखु ।
धाइ । ‘पर्सनलाइज पोलिटिकल ।’ छिकपिं देय्या नेतात । छिकपिंनि ल्वापुयात निम्हतिपूया क्वथा ल्वापु जक खः धकाः मजाक याये मजिउ । धाये दइमखु। छिकपिनि छगः छगः खँग्वःया गम्भिर राजनीतिक अथं पिहां वइ । व सार्वजनिक सरोकारया विषय जुइ । देय् व जनता थुकिं प्रभावित जुइ । देय् देय् खः । देय्यात सुनानं निम्हतिपूया ल्वायेगु, जायेगु लासा खंके मजिउ ।
LEAVE YOUR COMMENTS