ख्वपया सल्लाघारीइ नेपाल इको प्यानल सनिल

ख्वप (नेपालभाषा टाइम्स) – थनया सल्लाघारीइ ‘नेपाल इको प्यानल सनिल’या नामं छगू सांगीतिक ज्याझ्वः जुल । सल्लाघारीइ च्वंगु नेवाः ननि रेष्टुरेन्टय् साइकल कनेक्ट भक्तपुरया ग्वसालय् वंगु शनिवाः सनिलय् उगु सांगीतिक ज्याझ्वः जूगु खः ।

साइकल कनेक्ट भक्तपुरया ग्वसालय् जूगु साइकल यात्राय् ब्वति कयादीपिं साइक्लिष्टतय् ‘रिफ्रेसमेन्ट’या निंतिं उगु सांगीतिक ज्याझ्वः जूगु खः । नेपाल इको प्यानल नांया निर्माण सामग्री कम्पनीया ग्वाहालिइ जूगु सांगीतिक ज्याझ्वलय् साइकल यात्रीत नेवाः ननिइ थ्यंकाः थःगु त्यानु चाःगु तकं ल्वःमंकाः न्ह्यइपुकूगु खः ।

साइकल यात्रीत सकलें त्यानु ल्वःमंकाः न्ह्यइपुकेया निंतिं ज्याझ्वलय् थीथी कलाकार व म्येँ हालामिपिंसं म्येँ हालाः सांगीतिक लकसया ब्वलंकूगु खः ।

ज्याझ्वलय् नवासें नेपाल इको प्यानलया प्रमुख कार्यकारी अधिकृत इन्जिनियर कृष्णभक्त दुवालं कम्पनीया सामाजिक उत्तरदायित्वकथं सांगीतिक सनिलया निंतिं थःपिंसं ग्वाहालि यानागु खँ कनादिल । साइकल संस्कृतियात प्रवद्र्धन यायेगु ल्याखं कम्पनीं नियमित रुपं साइकल कनेक्ट भक्तपुरलिसे सहकार्य व समन्वय याना वयाच्वनागु नं वय्कलं जानकारी बियादिल ।

ख्वप नगरपालिकाया प्रमुख सुनिल प्रजापतिं उलेज्या यानादीगु साइकल यात्राय् न्यासः स्वयां अप्वः साइक्लिष्टतय्सं ब्वति काःगु खःसा थ्व झ्वलय् १५०, १०० व ५० यानाः स्वंगू बिस्कं बिस्कं रुटया परिक्रमा याःगु खः ।

थःथःगु रुटकथं साइकल यात्राय् वंपिं इपिं सकलें यात्रा क्वचायेकाः नेवाः ननिइ थ्यंकः वःगु खः ।