बुंगद्यः रथय् बिज्याकाः जात्रा न्ह्यात

यल(नेपालभाषा टाइम्स)- स्वनिगःया दकलय् ताःहाकःगु जात्रा कथं परिचित बुंगद्यःया जात्रा म्हिगःनिसें न्ह्यात । म्हिगः बुंगद्यःयात पूच्वय् च्वंगु रथय् विराजमान याकाः थ्व जात्रा न्ह्याकूगु खः । द्यःयात रथय् विराजमान याःगुयां प्यन्हु लिपा रथ सालीगु चलन दु । थ्व ल्याखं आः कंस आइतवाः रथ सालीगु जूगु दु । बुंगद्यःया रथयात्रा करिब लत्या तक न्ह्याइगु परम्परा दु ।

बुंगद्यःयात वा वयेकीम्ह द्यः माने याइ । लिच्छवि जुजु नरेन्द्रदेवया पालय् देसय् वा मवयाः तसकं हाहाकार जुयाच्वंगु इलय् भारतया कामारुकामाक्षा वनाः बुंगद्यःयात नेपाः हःगु व वयां लिपा वा वःगु धइगु किंवदन्ती दु ।