ने. सं. ११४३ चौलाथ्व पारू -

इलय् ज्या मयाइपिं ठेकेदारयात कारवाही

सरकारं थीथी आयोजना व परियोजना निर्माणया ठेक्का कयाः ज्या मयाइपिंत कारवाही याइगु जूगु दु । ठेक्का धाःसा कायेगु तर, इलय् ज्या मयाइपिं व ज्या सिमधयेकीपिं ठेकेदारया पहिचान यानाः कडा कानुनी कारवाही यायेत्यंगु खः । सरकारी निकायया उच्चस्तरीय अधिकारीतय् दथुइ जूगु छगू सहलहया इलय् ठेक्का ल्हातय् लाकेगु तर ज्या धाःसा इलय् मयाइपिं व अनेक त्वहः चिनाः विकास निर्माण व मर्मतया ज्यायात लिछ्यायेत स्वइपिं ठेकेदारतय्त कारवाही यायेगु तयारी याःगु खः।
स्वनिगःया सतक विस्तार, त्वने लःया संजाल, धू, कुँ व प्रदूषणया अवस्था व उकिया सुधारया सम्बन्धय् जूगु सहलह ज्याझ्वलय् सहभागि यक्वसिनं सरकारी योजना ठेकेदारया ढिलासुस्ती व लापरवाहीया कारणं इलय् अज्याःगु निर्माण योजनात सम्पन्न जुइमफुगु खँय् चिउताः प्वंकूगु खः ।

ज्याझ्वलय् प्रधानमन्त्री केपी ओलीया प्रमुख सल्लाहकार विष्णु रिमालं गलत ज्या याइपिं व आवश्यक मापदण्ड पूरा मयाइपिं ठेकेदार न्ह्यागु हे राजनीतिक पहुँच दुम्ह जूसां वयात कारवाही यायेगु जुइ धयादिल । सरकारी ज्याय् अन्तरनिकाय समन्वय मुख्य समस्या जूगु धासें वय्कलं निश्चित समयावधि क्वःछिनाः थःगु ज्या क्वचायेकेत इनाप यासें प्रधानमन्त्री व मन्त्रिपरिषद् ज्याकूपाखें आवश्यक दक्वं ग्वाहालि यायेत नं तयार दुु धयादिल । प्रधानमन्त्री ज्याकूया सचिव महेन्द्रमान गुरुंगं धू, कुँया कारणं स्वनिगलय् अप्वया वनाच्वंगु वातावरण प्रदूषण नियन्त्रणया निंतिं इलय् सतक निर्माण व ममर्त नापं सवारी साधनया उचित व्यवस्थाय् लगे जुइत सम्बन्धित निकाययात निर्देशन बियादिल । सतक विस्तार जुइधुंकूगु थासय् तत्काल सतक कालोपत्र यायेत व मतया लठ्ठाय् खने दुगु अनावश्यक तारया व्यवस्थापन नं यायेत निर्देशन बियादिसें वय्कलं आः दक्वं ज्या उच्चरस्तरपाखें नियमित रुपं अनुगमन यायेगु जुइ धकाः नं धयादीगु दु ।

प्रधानमन्त्री ज्याकूया हे मेम्ह सचिव प्रेमकुमार राईं स्वनिगलय् निर्माणाधीन गुलिखे परियोजनां मापदण्ड पालना याःगु खने मदुगु धासें उकी सम्बन्धित निकायं कडा रुपं पालना याकेगुलिइ लगे जुइमः व थथे जुइ फत धाःसा तत्काल उकिया लिच्वः नं खने दइगु वय्कःया धापू दु । अर्थ मन्त्रालयया सचिव शंकरप्रसाद अधिकारीं बजेटया अभावं छुं नं विकास निर्माणया दी मजिउ, दिके मजिउ धासें स्रोतया सुनिश्चितता जुइ धुंकूगु छुं नं योजनाय् बजेट अभाव जुइके मबीगु प्रतिवद्धता प्वंकादिल । भौतिक पूर्वाधार व यातायात मन्त्रालयया सचिव देवेन्द्र कार्कीं सतकय् दुगु दक्वं संरचना चिइके धुंकाः जक कालोपत्र याये फइगु जूगुलिं सतक कालोपत्र यायेगु ज्या लिबानाच्वंगु धयादिल । वइगु २०७५ बैशाख १ गतेनिसें स्वनिगलय् सवारी साधन प्रदूषण नियन्त्रणा निंतिं न्हूगु नियम लागू जुइत्यंगु जानकारी नं वय्कलं बियादिल ।

अथे हे जनसंख्या व वातावरण मन्त्रालयया सचिव प्रकाश माथेमां स्वनिगलय् प्रदूषण अप्वःगुया मुख्य कारण सतकया धू व सवारी साधनया अप्वःगु चापया कारणं उकिया व्यवस्थापनया निंतिं सम्बन्धित निकायं अल्पकाली व दीर्घकालीन योजना दयेकाः समाधानया लँपु मालेमाः धयादिल ।यल महानगरपालिकाया प्रमुख चिरिबाबु महर्जनं यल महानगर लागाय् नं सतक निर्माणय् ढिलासुस्ती यानाः ठेकेदारं दुःख बियाच्वंगु धासें अज्याःपिं ठेकेदार विरुद्ध कडा निर्णय यायेमाःगु आवश्यक जू धयादिल ।