ने. सं. ११४४ कौलाथ्व पञ्चमी -

आइटी पार्कय् सुरक्षण मुद्रण प्रेस

येँ – झी मध्ये यक्वसिनं सिउगु खइमखु कि आम नेपाली नगरिकया निंतिं मदयेक मगाःगु नागरिकतानिसें कयाः कारोबार यायेत माःगु ध्यबा (नोट), विदेश वनेत माःगु पासपोर्ट, बैंकिंग कारोबारया निंतिं आवश्यक चेकबुक, एटीएम कार्ड, सवारी चालक अनुमति पत्र, सवारी साधनय् थौंकन्हय् प्रयोग जुयाच्वंगु नं प्लेट तकं पिने वइगु खः ।

आतक विदेशय् छापे जुया वइगु थुपिं सकताः आवंनिसें नेपालय् उकिया सेवा शुरु यायेत्यंगु दु । उकिया निंतिं भ्वतय् च्वंगु सूचना प्रविधि पार्कयात संचालनय् हयेत्यंगु खः । संचार व सूचना प्रविधिमन्त्री गोकुलप्रसाद बाँस्कोटां भ्वतय् च्वंगु सूचना प्रविधि पार्कयात ‘सुरक्षण मुद्रण प्रेस’या रुपय् संचालन यायेगु धयादीगु खः । बनेपा महोत्सव–२०७५ या उलेज्या यासें मन्त्री बाँस्कोटां करिब ५० अर्ब खर्चय् स्थापना जूगु सूचना प्रविधि पार्कयात प्रयोगय् हयेगु निंतिं उगु योजना न्ह्यःने हयागु खः धयादिल ।

थीथीकथंया आवश्यक सरकारी ज्याया निंतिं च्यागू अर्ब व निजी ख्यःया निगू अर्ब यानाः दँय्दसं १० गू अर्ब स्वयां अप्वः ध्यबा विदेश वनाच्वंगुलिं उकियात पनेत देय् दुने हे दुगु सुविधायात छ्यलेगु ल्याखं सरकारं थुगु योजना न्ह्यःने हःगु धयादिल ।

प्रेस संचालन यायेगु ज्या ध्यबा व व्यापार नाप जक स्वाकाः स्वये मजिउ धासें सार्वभौमसत्ता व राष्ट्रिय सुरक्षा नाप स्वानाच्वंगु विषय नं जूगुलिं विदेशय् छापे याना हयेमाःगु सकतां ज्या आः भ्वतय् सुरक्षण प्रेस संचालन यानाः थन हे छापे यायेगु व्यवस्था यायेगु जुइ धयादिल । यदि सुरक्षण प्रेस संचालन याये फत धाःसा स्वद्वः मनूयात लजगाः नं दइगु, बेरोजगारीया समस्या नं म्हो जुइगु व विदेश पलायन जुइमालीगु समस्या नं मवइगु वय्कलं धयादिल ।