ने. सं. ११४३ चौलाथ्व पारू -

पंजरांया निंतिं मूल समिति नीस्वन

येँ – दँय्दसं थें थुगुसी नं मंकाःकथं पंजरां नखः हनेगु निंतिं छगू मूल समिति नीस्वंगु दु । नेपाःया बौद्ध नेवाःतय् तःजिगु पर्व पंजरां तःजिक हनेगु निंतिं राजगुरुजु मञ्जुश्रीरत्न वज्राचार्यया संयोजकत्वय् १०८ म्ह दुजः दुथ्याःगु ‘सामूहिक पंजरां मूल समिति’ नीस्वंगु खः ।

वंगु मंगलवाः जूगु विशेष मुँज्यां प्रा. डा. नरेशमान वज्राचार्यया संरक्षकत्वय् राजगुरुजु वज्राचार्यया संयोजकत्वय् ‘सामूहिक पंचदान ज्याझ्वः–२०७६’ गठन याःगु खः । समितिइ येँ देय्या झिंच्यागू बहाः, झिगू शाक्य बहाः, झिंखुगू बहीलिसें यल, ख्वप, किपूया गुरुजु, गुरुमांजु व जयमांपिं नं दुथ्याकातःगु दु ।

मुँज्याय् नवासें संयोजक राजगुरुजु वज्राचार्यं नेवाः बौद्धतय् तःजिगु नखः पंजरां पर्वयात म्वाका तयेत व ईकथं न्ह्याका यंकेत नेपाल परम्परागत बौद्ध धर्म संघ कान्तिपुर शाखां दँय्दसं मंकाःकथं पंजरां फः वनेगु ज्याझ्वः न्ह्याका वयाच्वंगु व थौंया इलय् तक थ्यंगु अवस्थाय् पंजरां काः वनीपिं व बीपिं नं उल्लेख्य रुपं अप्वया वनाच्वंगु जानकारी बियादिल ।

लिसें वय्कलं पंजरांपाखें संकलन जूगु दान दक्षिणा लुम्बिनीस्थित नेपाल वज्रयान महाविहार निर्माण यायेत तःधंगु तिबः जूगुलिं व पंजरांपाखें संकलन जूगु दान दक्षिण उगु विहारया निंतिं बियादीपिं सकसिगुं नं विहारप्रति उलि हे अधिकार दु धासें विहार निर्माणया ज्या पूवंकेगुलिइ नं दायित्व दु धयादिल ।

बौद्ध विद्वानलिसें समितिया संरक्षक प्रा.डा. वज्रचार्यं लुम्बिनीइ निर्माण जुयाच्वंगु वज्रयान महाविहार नेपाःमिपिनिगु हे दान दक्षिणापाखें निर्माण जूगुलिं थ्व झी सकल नेपाःमिपिनिगु मंकाः विहार जूगु खँ न्ह्यथनादिल । थ्व हे झ्वलय् वय्कलं बौद्ध धर्मय् मिसा मिजंयात उतिकं सम्मानया थाय् बियातःगु चर्चा यासें योग्यपिं मिसामिजंयात संघकथं दुथ्याका यंकेगु व योग्यपिं मिसापिंत नं प्रव्रजित याना यंकेगु लक्ष्य दुगु जानकारी बियादिल ।

पंजरांया इलय् फक्व अप्वः जनसहभागिता दयेकेया निंतिं २७ म्ह दुजः दुगु ज्यासना पुचः नं गठन यानागु जानकारी बिउगु खः । थुगुसी पंजरां नखः थ्व हे वइगु भदौ ११ गते लानाच्वंगु दु ।