बिस्काः जात्रा बन्दविरुद्ध द्वलंद्वः मनूत सतकय्

ख्वप – ख्वपया तःजिगु बिस्काः जात्रा माने याके मखु धकाः सिडियो कार्यालयं एकतर्फी रुपं निर्णय यायेवं जात्राप्रेमी नेवाः समुदाय स्वत्तस्फूर्त रुपं सतकय् कुहां वःगु दु । टौमढी स्थिति भैलखः दयेकाच्वंगु थासय् द्वलंद्वः ख्वपबासी जनता पिहां वयाः सिडियोया उगु निर्णय लित कायेत दबाब बिउगु खः । म्हिगः सनिलय् ख्वपया प्रमुख जिल्ला अधिकारी प्रेमप्रसाद भट्टराईया संयोजकत्वय् जिल्ला समन्वय समिति ख्वपया अध्यक्ष नवराज गेलाल सहित झिंप्यम्ह खय्तय् जक मुँज्यां नेवाः जातिं परापूर्वकालंनिसें न्यायेका वयाच्वंगु तःजिगु जात्रा बिस्काः जात्रा बन्द यायेगु निर्णय याःगु खः । उकी सहायक प्रमुख जिल्ला अधिकारी मुकेश कुमार केशरी नापं झिंप्यम्ह गैरनेवाःतय् हस्ताक्षर लानाच्वंगु दु ।

उगु खँ सार्वजनिक जुइवं जात्राप्रेमी स्थानीय जनता सोमवाः सुथय्निसें हे टौमढी मुनाः याकनं याकनं भैलखः दयेकेगु ज्या न्ह्याकूगु दु । म्हिगः हे उगु भैलःखःया पूर्ण रुपं पौ चिनाः उकी न्ह्यःनेया ब्वय् म्हासुगु रंग पाःगु खः ।

भारतया थीथी प्रान्तय् कोरोनाया निगूगु लहर चले जूगु त्वह तयाः ख्वपय् थुकथंया भैलःखः सालेगु व यःसिं थनेगु थेंज्याःगु बिस्काः जात्राया थीथी ज्याझ्वः पनेत निर्देशन जारी याःगु खः । सिडिओया निर्देशनयात पालना याये मफइगु ख्याच्वः बिसें स्थानीय जनतां जात्रा स्थानीय तहया नेतृत्वय् जुइगुलिं स्थानीय तहं हे यायेगु मयायेगु निर्णय याइ धासें नेपाःया ध्वाँय् ज्वनाः टौमढीइ प्रदर्शन याःगु खः । सिडिओं उगु निर्णय लितः मकातले न्हिंन्हिं प्रदर्शन यायेगु खँ सहभागीतय्सं धाःगु दु ।

द्वलंद्वःया ल्याखय् ल्याय्म्हत जानाः स्वत्तस्फूर्त रुपं जूगु थुगु प्रदर्शनयात स्थानीय प्रशासनं धाःसा मुकदर्शक जुया स्वयाच्वंगु दु । स्थानीय निकाय ख्वप नगरपालिकां धाःसा थुगुसी जात्रा यानाः हे न्हापा स्वयां अप्वः पर्यटकतय्त दुत हयेगु निर्णय याना तयेधुंकूगु दु । थ्व झ्वलय् मध्यपुर थिमि नगरपालिकाया मेयर मदनसुन्दर श्रेष्ठं नं थुगुसी मध्यपुर थिमिइ जुइगु बिस्काः जात्रा मदिइगु जानकारी बिइधुंकूगु दु ।

सम्बन्धित बुखँ

LEAVE YOUR COMMENTS