ने. सं. ११४३ तछलाथ्व त्रयोदशी -

निम्ह द्ववं व घाँय्

नेपाःया राजनीति गन ? गुथाय् ? थुकिया लिसः बारे च्यूताः तयेगु आम नागरिकया सरोकारया खँ खः, जुइ । देशया राजनैतिक अवस्थाया चिउताः तयेत राजनैतिक खेलाडी हे जुइमाः धयागु मदु। देशया राजनीतिं आम जनताया दैनिक अले निकट भविष्यया जीवनयात नं प्रभावित यानाच्वनी । छप्य नयेगु, पुनेगुया निंतिं जनतां सिनाः सिनाः परिश्रम यानाच्वंसा देशया राजनीति सुथां मलाःसा जनतां खिचां मनःगु दुःख सी । राजनीतिज्ञत शासनय् वयेत लालायित जुइ, अनेक दाउ छ्यलाः शक्तिइ वइ । तर सत्ताय् वइगु गुंगुं सरकारं नं दे व जनतायात देशय् सरकार दु धयागु आशावादी अनुभूति बी फइमखु । जनता छथाय् ध्याकुनय्, वाध्यताया जीवन हनेत विवश । मेखेर राजनीतिज्ञत कुत्सित खेलय् व्यस्त, मस्त । हर क्षण, हर पल जनताप्रति सम्वेदनशील जुइमाःगु सरकार थौं आम जनताया निंतिं अस्तित्वय् दु ला मदुला शंकाया विषय जुइ । तःधंगु न्ह्यसः जुयाः लुइ ।

थौं देशया हालत छु, स्थिति गुलि दुःखद अवस्थाय् । छम्ह मर्चा नं क्यनेफु । छखे देश कोरोनाया महामारीं ग्रस्त । कन्हय् गज्याःगु भयावह स्थिति जनतां भोग यायेमालीगु ? जनता त्रसित । उपचारया व्यवस्था गय् च्वं, थौं देशया दर्दनाक अस्पतालतय् हालतं क्यनी । दकल् चिन्ताया खँ ला उपचारया अवसर हे पर्याप्त मदु। सीमित । सर्वसाधारणया पहुँच पिने । आः थथे हे जूसा अस्पतालय् उ पचारया अवसर कायेत नं राजनैतिक शक्तिया प्रयोग जुया वइ । लेनदेनया कारोवारया आधारय् विरामीत सीगु, म्वायेगु अवस्थाय् लाइ । अशक्त जनता उपचारया नामय् भाग्यय्नि र्भर जुइ माली । थःगु कपाः दायाच्वने माली ।

देशया सरकारयात थासय् हयेत प्रतिपक्षया तःधंगु भूमिका दइ । राजनीति शास्त्रं धाइ । तर थन थौं राजनीतिइ प्रतिपक्ष गन दु? गुगु अन्धकारय् तनाच्वन ? मत च्याकाः मालेमाःगु अवस्था दु। शक्तिइ मदुसां प्रतिपक्षं जनताया आधारभूत समस्यायात कयाः न्ववाये माःगु खः । तर लाचार छाँया सरकार जुयाः प्रतिपक्ष मुर्छित अवस्थाय् चातुवानाच्वंगु दु ।

कोरोनाया उपचारया विशेषज्ञतसें धाइ कोरोना लिसे ल्वायेत मनोबल फयांफत्तले क्वातुकेमाः । मन बल्लाकेगु हे कोरोनायात बुकेगु तःधंगु वासः खः । मनोबल विषय डाक्टरतसें प्रचवन बियाच्वनी । ल्हाः साबुनं सिले माः धाइ, मास्क तयेगु अनिवार्य धाइ । स्यानिटाइजर घाना तयेमाः धाइ । धाये अःपु, धरहरा तःपु धाः थें । डाक्टरं थःगु पेशागत हिसाबं धाःसां आम जनतायाके डाक्टरया सल्लाह कथं च्वनेगु क्षमता दु लाकि मदु ? मू खँ जुइ । ल्हाः सिलेगु बारे थौं गाक्कं हल्ला जुयाच्वंगु दु। ल्हाः सिलेत लः माः । थौं सामान्य जीवनत हनेत हे लःया हाहाकार । हितिं लः मवःगु दँदँ दयेधुंकल । त्वनेत लः चूलाकेत धौधौ । आः पलाःपतिं साबुनं ल्हाः सिलेत लः गनं वइगु खः ? साबुं, स्यानिटाइजर, मास्क सितिकं दइमखु। बजारय् नक्कली साब्वं, स्यानिटाइजर, मास्कया जगजगी । भाः काये फक्व काइगु। थज्याःगु अवस्थाय् स्वास्थ्य शिक्षा, मनोस्वास्थ्यया परामर्श महत्वहीन जुइ । जनतायात दुःखं झं चि मल्ता हाःहाः याये थें जुइ । डाक्टरया परामर्शं मनूतय्म नोबल झं कमजोर याइ ।

देशय् सरकार राजनैतिक खेलय् थुलि व्यस्त कि थ्वं कोरोनाया प्रकोप देशय् गनं दूरदराजय् जक खः थे मखुथे जुयाच्वंगु अनुभूति यानाच्वंगु दु। देशया सरकारयात थासय् हयेत प्रतिपक्षया तःधंगु भूमिका दइ । राजनीति शास्त्रं धाइ । तर थन थौं राजनीतिइ प्रतिपक्ष गन दु ? गुगु अन्धकारय्त नाच्वन ? मत च्याकाः मालेमाःगु अवस्था दु। शक्तिइ मदुसां प्रतिपक्षं जनताया आधारभूत समस्यायात कयाः न्ववाये माःगु खः । तर लाचार छाँया सरकार जुयाः प्रतिपक्ष मुर्छित अवस्थाय् चातुवानाच्वंगु दु। थौं प्रतिपक्षया भूमिका युट्युबया निश्चित निम्ह प्यम्ह राजनैतिक विश्लेषकत भरय् । यु ट्युब स्वये थौं प्रतिपक्षया मञ्चन जुइगु थाय् जुयाच्वन ।

राजनैतिक विश्लेषकतय्सं नं आः याकनं देशय् उथलपुथल जुइ धाइ । जनतायात टर्च च्याकाः क्यनी । ग्व ? हिउपाः वइत, वइ धाःगु खँ नं ध्वंया कुतुं वइ धाःगु मृगतृष्णा थें जुइ । थौं देशय् सरकारी राजनैतिक समस्या हे नेकपा दुनेया कलह खः । नेकपाया सरकार, तर नेकपा सरकार थःगु जनता प्रतिया सरकारी दायित्वयात ल्वःमंकाः शक्ति संघर्षय् तनाच्वंगु दु । नेकपाया कार्यकर्तातसें नेकपा त्वाःदलकि देश खतराय् लाय, आम जनतां दुःख सी पिने पिनें धयाजुइ । अखडाय् निम्ह नेता मल्ल युद्धय् तल्लिन जुइ । थःथःगु खम्पा दायाः ‘का व’’ धकाः इशारा यानाच्वनी । प्रबुद्ध जनतां व्यक्त याना हइ, देशं राजनैतिक निकाश कायेगु खःसा एमाले व माओवादीया अस्वाभाविक व अप्राकृतिक एकता अन्त जुइमाः । देशया राजनीतियात कृत्रिम, जबर्जस्त लँय् फसे यानाः देश, जनतया विषयय् गुबलय् चिउताः तइगु ? निम्ह द्ववं ल्वानाः घाँय् चुं दनिथें निम्ह नेताया ल्वापुं देश व जनतां दुःख सी फइमखु ।