क्लोज मजूनिगु च्याप्टर

बहुदलीय प्रजातन्त्रया स्थापना लिपा चर्चा व विवादय् वयाच्वनीगु छगू नां खः, वामदेव गौतम । तःक्वः सरकारया मन्त्रीमण्डलय् दुथ्यायेधुंकूम्ह गौतम हानं छक्वः चर्चाय् वल । अले चर्चा नाप तच्वकं विवादय् नं लात । छम्ह वहालवाला सभासद्यात राजीनामा याकाः उपनिर्वाचन मार्फत सभासद् जुइगु वय्कःया धृष्टता थुगुसी चर्चाया कारण जुल ।

उकिसनं नं येँया क्षेत्र नम्बर ७ – नेवाःतय् बाहुल्यता दुगु क्षेत्रय् उम्मेदवारी बीगु चेष्टाया कारणं वय्कः विवादय् लात । लोकतान्त्रिक चरित्रया ल्याखं थ्व गुलि सही व गलत खः धयाच्वनेमाःगु आवश्यकता मदु । अथे जुइक नं छम्ह ‘टुरिष्ट उम्मेदवार’ कथं नेवाःतय् बाहुल्यता दुगु क्षेत्रय् चुनाव ल्वायेगु वय्कःया धृष्टता खनाः दक्वं वाताहां जुल ।

वय्कःयात उपनिर्वा–चनय् थनेत ग्वाहालि याःम्ह क्षेत्र नम्बर ७ या सभासद् रामवीर मानन्धरं राजीमाया घोषणा यासें धयादिल, ‘वामदेव गौतम थुगु क्षेत्रं निर्वाचित जूसा येँ नापं देशया विकास जुइ ।’ रामवीरया खँयात नालाकायेगु खःसा वामदेवयात येँय् थनेहःगु थीथी कारण मध्ये छगू कारण खः – येँया विकास यायेत ।

अथे खःसा दकलय् न्हापां येँया जनतायात गुकथंया विकास माःगु खः धइगु विषय प्रष्ट जुइमाःगु खः । थनया आदिवासी नेवाःतय्सं धयाच्वंगु येँया विकास स्वयां व्यवस्थापनया खँ प्रमुख खः । थनया जनसंख्या अप्वः जुल, आः आप्रवासी नीति हयाः स्वनिगः दुनेया जनसंख्याया व्यवस्थापन यायेगु खः ।

अले मेगु धइगु स्वनिगः दुनेया बुँज्या याये जिउगु जग्गायात न्याये–मी बन्द यायेगु, गुलि नं खाली जग्गा दनि अन न्हूगु वस्ती निर्माण यायेगु ज्या याके मबीगु । नेवाःतय्सं माग यानाच्वंगु मध्ये थुपिं प्रमुख खत । तर नेता वामदेवया विकास मोडल थ्व निगुलिं प्रमुख माग स्वयां बिल्कुल अःखः ।

वय्कलं निदँ न्ह्यः च्वयादीगु ‘नेपाल नवनिर्माण महाअभियान’ सफूया निगू बुँदां थुकियात यच्चुक पुष्टि याइ । वय्कलं ‘राजधानी सुधार तथा विकास’ शीर्षक अन्तर्गत ४ नम्बर बुँदाय् च्वयादीगु दु – विस्तार यानाः विकसित याःगु राजधानीइ छगू करोड जनसंख्या बसोबास याये जिउगु छगू मेगा सहर सहित नीगू अत्याधुनिक स्याटलाइट सहर विकास यायेगु । (नेपाल नवनिर्माण महाअभियान, पृष्ठ ९५)

अथेहे १४ नम्बर बुँदाय् च्वयातःगु दु – राजधानी भित्री, बाहिरी व वृहत् यानाः स्वंगू चक्रपथ निर्माण, विस्तार व विकास यायेगु । (नेपाल नवनिर्माण महाअभियान, पृष्ठ ९६)
वय्कःया सफुली दुथ्याःगु थुगु निगू बुँदा जक स्वयेगु खःसा प्रष्ट जुइ कि वय्कलं स्वनिगलय् याये चाहे जूगु विकासया मोडल छु खः । थ्व अज्याःगु विकास परियोजनाया परिकल्पना खः गुगु स्वनिगःया जनताया चाहना व सोचया अःखः खः ।

अथे खःसां वय्कलं येँया क्षेत्र नम्बर ७ य् उम्मेदवारी बीगु आँट यानादिल । वय्कःया आँट छगू थासय् दु । तर थनया जनताया अभिमत कयाः सभासद् जुयादीम्ह रामवीरं वामदेव थेंज्याःम्हेसित स्वनिगःया विकास यायेगु निंतिं थःगु पद त्वःतेगु आँट यानादीगु धाःसा तसकं ग्यानापु ।
रामवीरया थुगु ज्याया निंतिं वामदेवं ला खुल्ला रुपं प्रशंसा यानादिल ।

पार्टी प्रति वफादार व पार्टीया सच्चा कार्यकर्ता धासें उच्च मूल्यांकन यायेगु नं धयादिल । उच्च मूल्यांकन यानामदीगु नं गथे यानाः, स्वयम् वय्कः थःगु हे निंतिं पद त्वःतूगु जुल । रामवीरयात वामदेवं याःगु मूल्यांकन प्रशंसनीय जुइफु । तर थःगु समुदाय, थःत भोट बिउपिं जनता नापं देय्या निंतिं धाःसा थ्व छगू धोका खः ।

थौं रामवीरं थःगु पार्टी प्रति ‘इमान्दारिता’ क्यनाः थःगु समुदाययात घात यानादिल । निक्वः तक सभासद् जुयादीम्ह रामवीर वहे घातया कारणं थौं जनता व थःगु समुदायपाखें बहिष्कृत जुइगु अवस्था वल ।

भोट बिउपिं जनताया अभिमतया कदर मयाःगु नापं छम्ह व्यक्तिया निंतिं लोकतान्त्रिक मूल्य व मान्यतायात हाजांगायाः पार्टी प्रति इमान्दारिता क्यनेगु धइगु देय् व जनताया निंतिं केवल धोका बाहेक मेगु छुं मखु ।नेवाः समुदायया मिखां स्वयेगु खःसा वय्कलं थःगु समुदाय प्रति यानादीगु तःधंगु विश्वासघात खः ।

वय्कलं छम्ह व्यक्तिया निंतिं जक पदत्याग यानादीगु मखु । अज्याःम्ह व्यक्तिया निंतिं पद त्याग यानादीगु खः सुनां नेवाःतय् आदिभूमियात झन् बरबाद यायेगु खाका निर्माण यात । वय्कलं अज्याःम्ह व्यक्तिया निंतिं राजीनामा बियादिल सुनां नेवाःतय् भूमि मेपिंत बीमाः धासें थन अझ अप्वः आप्रवासीत दुकायेगु म्हगस खंकादिल ।

वय्कलं अज्याःम्ह व्यक्तियात ग्वाहालि यानादिल सुनां बुँज्या योग्य नेवाःतय् भूमियात अधिग्रहण यानाः स्वंगू–स्वंगू चक्रपथ दयेकेगु बिचाः यानादिल । धाये हे माः रामवीरं अज्याःम्ह मनूयात पत्याः यानाः थःगु निर्वाचन क्षेत्र त्वःतल सुनां नेवाः समुदाय व स्वनिगःया छुं नं कथं विकास व उन्नति याये फइ मखु ।

नेवाः बुद्धिजीवी व नेवाः न्ह्यलुवातय्सं बारम्बार धायेगु याः कि नेवाःतय्सं थःगु अधिकारया निंतिं राजनीति यायेमाल । पक्कां अधिकारया निंतिं राजनीति यायेमाः । तर रामवीर थज्याःम्ह पार्टीभक्त जक जुयाः मखु । पार्टी स्वयां च्वय् जनता खः । जनताया सर्वाेच्चतायात छुं नं पार्टीं हाजां गाये फइ मखु । उकिं थःत अभिमत बीपिं थःगु समुदाय व जनताया हित स्वयां च्वय् पार्टीया निर्णय जुइ मखु ।

थौं नेवाःतय्सं राजनीतिक याये माल तर पार्टीया अन्धभक्त जुयाः मखु थःगु समुदाय व जनतायात दकलय् च्वय् तयाः ।थौं नं आपालं नेवाःत राजनीति यानाच्वंगु दु । थीथी पार्टीया सिद्धान्तयात ज्वनाः । पार्टी प्रति इमान्दार व निष्ठावान जुया । तर थौंया नेवाः समाजया माग केवल पार्टी प्रति इमान्दार जुइम्ह नेवाः राजनीतिज्ञ मखु समुदायया मुद्दा व एजेण्डायात स्थापित याइम्ह नेता मालाच्वंगु दु ।

थौं रामवीरं थःगु पार्टी प्रति ‘इमान्दारिता’ क्यनाः थःगु समुदाययात घात यानादिल । निक्वः तक सभासद् जुयादीम्ह रामवीर वहे घातया कारणं थौं जनता व थःगु समुदायपाखें बहिष्कृत जुइगु अवस्था वल । थ्व पार्टी प्रति अप्वः ‘इमान्दार’ जुइगु व थः समुदाय प्रति याःगु विश्वासघातया फल खत ।

थौं छम्ह रामवीर थ्व हालतय् थ्यन । कन्हय् मेम्ह अज्याःम्ह हे पार्टीया बफादार नेवाः नेतायात थज्याःगु अवस्था वइमखु धकाः धायेगु थाय् मदु ।उकिं थौं केवल वामदेवं येँयाः क्षेत्र नम्बर ७ या उपनिर्वाचनय् मदनीगु धकाः चुनावया च्याप्टर जक क्लोज जूगु खः । थीथी पार्टी लगे जुयाच्वंपिं नेवाः नेता व कार्यकर्तातय् निंतिं धाःसा छगू न्हूगु च्याप्टरया शुरुवात जूगु दु ।

पार्टी लाइनयात जनता व थःगु समुदाय प्रति लादे यायेगु वा जनता व थःगु समुदायया सःयात ज्वनाः पार्टी थुने ल्वायेगु । रामवीरया प्रकरणं छगू शिक्षा बिउगु दु । ल्ययेगु जिम्मा वय्कःपिनि ल्हातय् दु ।