रुसं नं बेलायती कुटनीतिज्ञ पितिनिगु

एजेन्सी- रुसं २३ म्ह बेलायती कुटनीतिज्ञयात देशं पितिनीगु जूगु दु । पुलांम्ह रुसी गुप्तचरयात बेलायतय् विष आक्रमण याःगु घटनायात कयाः रुस व बेलायत दथुइ तनाव ब्वलनाच्वंगु झ्वलय् रुसया थ्व निर्णय वःगु खः । थ्वयां न्ह्यः बेलायतं रुसी कुटनीतिज्ञतय्त निष्काशन यायेधुंकूगु दु ।
रुसी विदेश मन्त्रालयं शनिवाः मस्कोय् च्वंगु बेलायती दूतावासया कुटनीतिक कर्मचारीतय्त ‘पर्सना नन ग्राटा’ अर्थात थःगु देय् दुहां वयेत व च्वनेत प्रतिबन्धित विदेशी घोषणा यानाः छवाः दुने रुस त्वःता वनेत उजं बिउगु खः ।
वंगु मार्च ४ य् पुलांम्ह रुसी गुप्तचरयात बेलायतय् जूगु आक्रमणय् रुसया ल्हाः दुगु द्वपं बेलायती सरकारं बिया वयाच्वंगु खः । थ्व लिपा बेलायतं २३ म्ह रुसी कुटनीतिज्ञयात निष्काशन यायेगु निर्णय याःगु खः । थुकिया हे प्रतिक्रिया कथं रुसं नं बेलायती कुटनीतिज्ञतय्त पितिनेगु निर्णय याःगु खः ।
रुसी विदेश मन्त्रालयं रुसय् च्वंगु ब्रिटिस काउन्सिल नं बन्द याकीगु जूगु दु । अथेहे सेन्ट पिटर्सवर्गय् महावाणिज्य दूतावास चायेकेत बेलायतयात बियातःगु अनुमति नं लित काइगु जूगु दु ।
पुलांम्ह रुसी गुप्तचर सेर्गेइ स्क्रिपाल व वया म्ह्याय् युलिया स्क्रिपाल आः अस्पतालय् उपचार जुयाच्वंगु दुसा उमिगु अवस्था अझं गम्भीर दुगु खँ धाःगु दु ।