ने. सं. ११४६ तछलागा द्वादशी -

इरानया ख्याच्वः : आपालं देय्‌यात आर्थिक नोक्सान जुइफु

तेहरान – इरानी रिभोलुसनरी गार्ड कोर्प्सं होर्मुज स्ट्रेटयात कयाः छुं नं हस्तक्षेप मयायेत धाःगु दु । यदि अमेरिकां आक्रमण जारी यानातल धाःसा होर्मुज जुयाः वये वने यायेगु ज्या पुनर्बहाली जुइ फइमखु धासें होर्मुजय् हस्तक्षेप मयायेत धाःगु खः ।

गार्ड कोर्प्सं यदि अमेरिकी आक्रमण जारी जुयाच्वन धाःसा होर्मुजपाखें सामान्य वये वने यायेततकं थाकुइ धासें थुकिया लिच्वः विश्वन्यंकंया अर्थतन्त्रय् लाइगु ख्याच्वः नं बिउगु दु ।

अमेरिकी आक्रमणलिपा जवाफी कारवाही यानावयाच्वंगु इरानं कुवेत, जोर्डन, बहराइन आदि देशय् च्वंगु अमेरिकी सै न्य केन्द्रयात लक्षित यानाः प्रहार यायेगु याना वयाच्वंगु दु । दुपिं देशय् आपालं क्षेप्यास्त्र व ड्रोन नं प्रहार यानागु इरानं दावी याःगु दु ।

थ्व स्वयां न्ह्यः इरानं थःगु हवाई सुरक्षा प्रणालीं अमेरिकाया एमकयू ९ नांया ड्रोन कुर्कागु दावी याःगु दु । इरानी समाचार एजेन्सीया कथं वंगु बुधवाः गार्ड कोर्प्सया एअर डिफेन्स युनिटं उगु ड्रोन पत्ता लगे यानाः नष्ट यानागु दावी याःगु खः । इरानया थ्व दावीयात अमेरिकां छुं प्रतिक्रिया धाःसा बिउगु मदुनि ।

थुखे वंगु निन्हुया दुने इरानय् १७० स्वयां अप्वः सै न्य केन्द्रयात लक्षित यानाः क्षेप्यास्त्र व ड्रोन आक्रमण यानागु अमेरिकां दावी याःगु दु । थःपिंसं थुगु आक्रमण इरानया हवाई रक्षा प्रणाली, क्षेप्यास्त्र व ड्रोन भण्डारण, सैन्य स्पीड बोट व होर्मुजया जःखः च्वंगु सैन्य केन्द्रयात लक्षित यानाः यानागु अमेरिकां न्ह्यथंगु दु ।

थ्व हे झ्वलय् विहीवाः दक्षिण इरानया आपालं थासय् विस्फोट जूगु दु । इरानया सरकारी संचार माध्यमं बुशहर आणविक केन्द्र, कोनारक व सिरिक लगायतया क्षेत्रय् विस्फोट जूगु धाःगु दु । तर थुकिया द्वपं थःपिनिगु शत्रु राष्ट्रयात बिउसां गुगुं नं नां धाःसा क्वःछिनातःगु मदु ।

अथे हे अमेरिका व इरान दथुइ तनाव अप्वये वं होर्मुजय् जहाजत वये वने यायेगु ठप्प जूगु दुसा थुकिं यानाः विश्वय् चिकंया आपर्तियात कयाः हाकनं चिउताः ब्वलंगु दु । लिसें कच्चा चिकंया भाः नं करिब १ प्रतिशतं थहां वंगु समाचार संस्था रोयटर्सं न्ह्यथंगु दु ।