जापानी प्रधानमन्त्रीयात लाकमय् नसाज्वल‌

एजेन्सी÷ जापानी प्रधानमन्त्री शिंजो आबे व वया जहानयात इजरायली प्रधानमन्त्री बेन्जामिन नेतान्याहुं बिउगु डिनरय् लाकमय् तयाः ‘डेजर्ट’ हयाबिल । वंगु मे २ तारिख जूगु डिनरय् इजरायलया सेलिब्रिटी व प्रधानमन्त्री नेतान्याहुया निजी शेफ मोशे सेगेवं शानदार डिनरया अन्तय् डेजर्ट कथं चकलेटं दयेकातःगु लाकामय् तयाः ‘डेजर्ट’ ला नकल, तर थुकियात कयाः जापान व इजरायलय् तःधंगु आलोचना जूगु दु । जापानी संस्कृतिइ लाकांयात तसकं अपमानजनक कथं कायेगु याः । अथे खःसां प्रधानमन्त्री आबें थःत हःगु डेजर्ट छुं मखुथें याउँक नयाबिल । छम्ह इजरायली कुटनीतिज्ञ इजरायली अखबार येदियोतो अहरानोतयात प्रतिक्रिया बिउगु दु, ‘थ्व तसकं असंवेदनशील व बेवकूफी ज्या खः ।’

वय्कलं धयादीगु दु, ‘जापानी संस्कृतिइ लाकां स्वयां तुच्छ मेगु छुं मदु । जापानीत छेँय् जक मखु, ज्याकुथिइ तकं लाकां पिने हे त्वःताः वनी । अथेहे प्रधानमन्त्री, मन्त्री, सांसदत तकं ज्याकुथिइ दुहां वनेबलय् लाका त्वःता वनी । थ्व ला छम्ह यहुदीयात सुंगुरया ख्वाःपाः दुगु भुइ नकेगु तयाबी थें जुल ।’
छम्ह जापानी कुटनीतिज्ञ येदियोतलिसे हे खँ ल्हासें धाःगु दु, ‘छुं नं संस्कृतिइ लाकांयात डिनर टेबलय् तइमखु जुइ । व शेफया दिमागय् जक छु वल जुइ ? यदि थ्व ख्याः जक खःसां प्रधानमन्त्रीलिसे जूगु थज्याःगु ख्याः िजिमित पचे मजुल ।’

शेफ सेगेवं हे थःगु सामाजिक सञ्जालय् डिनरया किपा पोष्ट याःगु खः । थ्व किपाय् लाकां शेपय् तयातःगु डेजर्ट नं खनेदुगु खः । शेफया पोस्टय् छम्हेस्यां कमेन्ट यानातःगु दु, ‘छिं तसकं तःधंगु गल्ती यानादिल ।’

मेम्ह छम्हेस्यां च्वयातःगु दु, ‘थ्व खँ गुबलें ल्वःमंके फइमखु, सेगेव जितः छ तसकं यः अय्सां छं जिमित मछालापुसे च्वंगु अवस्थाय् लाकाबिल ।’तःगू हे अवार्ड त्याकेधुंकूम्ह शेफ सेगेवया इजरायलय् तःगू हे रेष्टुराँ दु, अथेहे पाकशिक्षा सम्बन्धी तःगू हे सफू च्वयेधुंकल । व छम्ह इजरायलया टेलिभिजन सेलिब्रटी नं खः ।

सम्बन्धित बुखँ

LEAVE YOUR COMMENTS