राष्ट्रपतिया भूमिका !
राष्ट्रपति देय्या सम्मानित संस्था खः । अले राष्ट्रपति गुगुं नं पार्टीया नेता वा कार्यकर्ता जुइ मदइगु प्रावधान दु। उकथं हे सभामुख नं न्हापा छुं पार्टीया नेता खःसां नं उगु पदय् कायम जुतले गुगुं नं पार्टीया सदस्यकथं गतिविधि याये मदइगु जक मखु, सभामुख नियुक्त जुइधुंकाः पार्टीया साधारण सदस्यतां तकं राजीनामा बीमाः । थुगु प्रावधान राष्ट्रपतियात नं लगे जू । तर नेपाःया विडम्बना धाये नेपाःया सम्मानित संस्थां थःगु गरिमा कायम याये मफुत धाःसा विवाद लाइगु स्वाभाविक खः । अझ धायेगु खःसा वर्तमान राष्ट्रपति विद्यादेवी भण्डारी राष्ट्रपति जुइधुंकाः पार्टीया ज्याय्ह स्तक्षेप यायेगु जक मखु पार्टीया निर्देशनकथं ज्या यायेगु याना वयाच्वंगु दु। अझ विशेष यानाः धायेगु हे खःसा प्रधानमन्त्री केपी ओलीं छु धाल उकियात पालना यायेगु ज्या राष्ट्रपतिं यानाच्वंगु दु ।
राष्ट्रपति जुइधुंकाः छुं छगू पार्टीया नेता जुइ मजिउ धइगु मान्यता दु। तर वर्तमान राष्ट्रपतिं आः नं थः डबल नेकपाया छम्ह कार्यकर्ता जक तायेकाच्वंगु दु। अले मुक्कं राष्ट्र व देय् दुने दुगु राजनीतिक पार्टीया राष्ट्रपति जुइ फयाच्वंगु मदु । संविधानया मर्मकथं स्वयेगु खःसा राष्ट्रपति भण्डारी थःगु पदया सम्मान याये मफयाच्वंगु अवस्था खः धकाः धायेमाःगु स्थिति जुयाच्वंगु दु । संविधानं राष्ट्रपतियात दकलय् सम्मानित व संविधानया संरक्षकया रुपय् कयातःगु दु। राष्ट्रपति स्वयमं सम्मानित संस्था जूगुलिं छुं कथंया भूमिका म्हितेगु अधिकार बियातःगु मदु। तर राष्ट्रपतिं यानाच्वंगु क्रियाकलापं धाःसा देय्या सर्वोच्च व सम्मानित संस्थायात विवादय् लाकेगु ज्या जुयाच्वंगु दु ।
थौंकन्हय् सत्तारुढ नेकपा पार्टीया आन्तरिक विवाद तच्वया वनाच्वंगु दु। पार्टीया विवादं पार्टी तज्याइगु तकया अवस्था ब्वलनाच्वंगु दु । विशेषतः प्रधानमन्त्री केपी शर्मा ओलीया कारणं पार्टीइ समस्या जुयाच्वंगु खः । थ्वहे झ्वलय् राष्ट्रपति विद्यादेवी भण्डारीं नेकपाया उपाध्यक्ष वामदेव गौतमयात थःगु निवासय् सःताः पार्टीया समस्या ज्यंकेत भूमिका म्हितेत इनाप यानादीगु दु । थ्व धइगु छगूकथं पार्टीया सक्रिय कार्यकर्तां म्हितेगु भूमिका बाहेक मेता मखु ।
थज्याःगु इलय् राष्ट्रपतिं पार्टीया विवाद ज्यंकेत स्वयेगु कि जनताया समस्या ज्यंकि धकाः सरकारयात सल्लाह बीगु धइगु न्ह्यसः ब्वलनाच्वंगु दु। राष्ट्रपति धइगु सरकार क्वःदली वा मदली धइगु खँया लिउ लिउ ब्वाँय् वनेगु लागि सृजना यानातःगु पद पक्का नं मखु ।
देशय् उलिमछिं समस्यात दु । कोरोना भाइरस संक्रमणया महामारी स्वनिगलय् अप्वया वनाच्वंगु दु । स्वनिगलय् माक्व आइसोलेसन कक्ष व माक्व उपकरणया व्यवस्था जुइ फयाच्वंगु मदु। थज्याःगु इलय् नेकपा दुने विवाद ब्वलनाच्वंगु दुसा मेखे आम सर्वसाधारण जनता वासः याये मखनाः अकाल मृत्युवरण यायेमाःगु अवस्था जुयाच्वंगु दु । थज्याःगु इलय् राष्ट्रपतिं पार्टीया विवाद ज्यंकेत स्वयेगु कि जनताया समस्या ज्यंकि धकाः सरकारयात सल्लाह बीगु धइगु न्ह्यसः ब्वलनाच्वंगु दु । राष्ट्रपति धइगु सरकार क्वःदली वा मदली धइगु खँया लिउ लिउ ब्वाँय् वनेगु लागि सृजना यानातःगु पद पक्का नं मखु। तर राष्ट्रपतिं आः यानाच्वंगु ज्या धाःसा विवादास्पद जुयाच्वंगु दु ।
थ्व स्वयां न्ह्यः नं राष्ट्रपतिं भण्डारीं थज्याःगु ज्या याःगु कारणं विवादय् लायेधुंकूगु दु । अझ नेकपाया निम्ह अध्यक्षया विवादया साक्षी नं राष्ट्रपति हे जूगु खँ चर्चाय् वःगु खः । पार्टी दुने ब्वलंगु विवाद लिपा राष्ट्रपतिं प्रम ओली व मेम्ह अध्यक्ष पुष्पकमल दाहालयात नाप लानाः पार्टीया समस्या ज्यंकी धकाः सल्लाह बिउगु खः । तर नं पार्टीया समस्या ज्यनीगु स्वयां झन जक तच्वया वनाच्वंगु दु। आः नं राष्ट्रपति भण्डारीं उपाध्यक्ष गौतमयात पार्टीया समस्या ज्यंकेत सुझाव बिउगु दु । मुक्कं पार्टीया विवादय् राष्ट्रपतिं याःगु हस्तक्षेपयात गुकथं कायेगु धइगु न्ह्यसः थन ब्वलनाच्वंगु दु ।
खय्तला राष्ट्रपति भण्डारीं पार्टीया विवादया झ्वलय् आपालं विवादास्पद भूमिका म्हितूगु दु। पार्टीया निम्ह अध्यक्ष दथुइ विवाद ब्वलनेवं राष्ट्रपति भण्डारी प्रम ओली व मेम्ह अध्यक्ष दाहालया दथुइ छम्हेस्यां सरकार संचालन व मेम्हेस्यां पार्टी संचालन यायेकथं जूगु सहमतिया साक्षी नं च्वंगु खः । उकथं हे स्थायी कमिटीया बैठक न्ह्यानाच्वंगु इलय् प्रधानमन्त्रीया राजीनामा फ्वने फइगु सम्भावना खनेदयेवं पार्टीया नेतातय्त शीतल निवासय् सःताः सल्लाह यायेगु ज्यातकं राष्ट्रपति भण्डारीं यात। अथें हे राष्ट्रपति भण्डारीं प्रधानमन्त्री केपी शर्मा ओलीं हःगु राजनीतिक दल विभाजन सम्बन्धी विधेयक नं प्रमाणीकरण यायेत तयारी यायेधुंकूगु खः । तर पार्टी मेम्ह अध्यक्ष दाहाल, वरिष्ठ नेतापिं झलनाथ खनाल व माधवकुमार नेपालया विरोधया कारणं उगु विधेयक प्रमाणित यायेगु ज्या दिकेमाःगु अवस्था ब्वलन ।
थ्व कथं स्वयेगु खःसा राष्ट्रपति देय्या मंकाः राष्ट्रपति मजुसे पार्टीया नं छगू गुटया नेतृत्वया स्वार्थसिद्ध यायेगुलिइ अप्वः केन्द्रीत जूगु आभास आम जनमानसं यानाच्वंगु दु। गुकिं यानाः राष्ट्रपति संस्था व पदया दुरुपयोग जूगु जकं मखुला धइगु न्ह्यसः थौं ब्वलनाच्वंगु दु । अझ नं राष्ट्रपतिया भूमिका विवादय् मलाकेगु खःसा आपालं लँपु दनि । तर व्यक्तियात केन्द्रीत यानाः राष्ट्रपतिं म्हितीगु भूमिका धाःसा न्ह्याबलें नं जुयाच्वनी । राष्ट्रपति सकसिया मंकाः संस्था खः । उकियात मनन यायेमाःगु अवस्था थौं जुयाच्वंगु दु। तर राष्ट्रपति स्वयमं हे थःगु गरिमायात कायम यायेगु कुतः मयाइगु इलय् राष्ट्रपति संस्थाया उपादेयता नं मदइगु अवस्था ब्वलनीगु स्वाभाविक खः । सुनां थःगु गरिमायात थुइके फइमखु अज्याःगु अवस्थाय् सम्मानित संस्थाया अवसान जुइगु स्वाभाविक खः । अले राष्ट्रपति भण्डारीं यानाच्वंगु ज्यां अज्याःगु हे लँपु क्यनाच्वंगु जकं मखुला धइगु न्ह्यसः नं ब्वलनाच्वंगु दु। खय्तला राष्ट्रपति भण्डारीया न्हापांगु कार्यकाल नं विवादास्पद हे खनेदु। आः वयाः उगु प्रक्रिया झन जक तच्वया वनाच्वंगु आभास जनतां याये मालाच्वंगु दु । अथेजुयाः गुबलय् तक राष्ट्रपति स्वयमं हे थःगु गरिमा कायम यायेगु लँपुइ वनी मखु गुकिं संघीय गणतन्त्र नेपाःया प्रगति बाधक जुइगु स्वाभाविक खः ।
LEAVE YOUR COMMENTS