भारतय् धमाधम अप्वयावल संक्रमितया ल्याः
येँ- नेपालय् कोरानाभाइरसया संक्रमण दुहां वयेफुगु छगू तःधंगु खतरा भारतपाखें दु । भारत तःधंगु देश जूगुयानापनापं नेपाःलिसे आपालं थासय् खुल्ला सीमा स्वानाच्वंगु कारणं यदिभारतय् संक्रमण तच्वयावनधाःसाउकियाप्रत्यक्षलिच्वः नेपाःयातलाये फइगु खतरा विज्ञतय्सं खंकाच्वंगु दु ।
अले भारतया वर्तमान अवस्था धाःसा सुधार जुइगु पलेसा धमाधम तच्वयावनीगु संकेत खने दयाच्वंगु दु । थौं बहनीतकयादुने भारतय् कोरोना प्रभावित मनूतय् ल्याः बढे जुयाः ६४९ म्हथ्यंगु दुसा सीपिनिल्याः १३ म्हथ्यंगु दु । ल्वय् जुयाः नं लंकावंपिं ४३ म्ह जक दु ।
भारतय् म्हिगःतक संक्रमितया ल्याः ४०० या जःखः थ्यनाच्वंगु खःसा थौं छक्वलं २०० अप्वयाः साढे ६०० थ्यंगु दु । भारत थेंज्याःगु यक्व जनसंख्यादुगु देशय् संक्रमितया ल्याःथथे अप्वया वंगुयात बांमलाःगु संकेतया रुपय् काःगु दु ।
भारतं संक्रमण पनेगु लागिं स्ववाःतक लकडाउन घोषणा याःगु दु । तर थीथी प्रान्तय् उकियात उल्लंघन यानाः मनूत पिहां वयाच्वंगुलिं उमित पनेत प्रहरीयात थाकुयाच्वंगु दु ।
पिहां वयाच्वंपिं मनूतय्त निगरानी तयेत व उमित चेतावनी बीगु लागिं म्हिगःनिसें थाय्थासय् ड्रोन ब्वयेकेगु यानाहःगु दु । न्हूदिल्ली, काश्मिर आदि लगायतया प्रदेशय् ड्रोन ब्वयेकाःपिहां वइपिंत चेतावनी बीगु ज्या यानाहःगु दु । पिहां वःपिं द्वलंद्वः मनूतय्त ज्वने नं धुंकूगु दु ।
भारतय् कोरोनाभाइरस प्रभावित प्रदेशत मध्ये महाराष्ट्र दकलय् च्वय् लानाच्वंगु दु । भारतया आर्थिक राजधानी मुम्बई शहर समेत दुथ्याःगु महाराष्ट्रय् संक्रमितया ल्याः १२४ थ्यंगु दुसा सीपिनि ल्याः ३ थ्यंगु दु । भारतय् न्हापांम्ह संक्रमित पत्ता लगे जूगु केरलाय् ११८ म्ह विरामी लूगु दुसा आःतक छम्ह हे सीगु मदुनि ।
राजधानी दिल्लीइ ३५ म्ह संक्रमित लूगु दुसा छम्ह सीगु दु । नेपाःलिसे सीमा स्वाःगु भारतया प्यंगुलिं प्रदेशय् संक्रमितत लूगु दु । उत्तर प्रदेशय् ३७म्ह, पश्चिम बंगालय् ९ म्ह, उत्तराखण्डय् ५ म्ह व विहारय् ३ म्ह संक्रमितलूगु दु । उकीमध्यय् पश्चिमबंगाल व विहारय् छम्ह÷छम्ह सीगु दु ।
थ्वहे झ्वलय् कोरोनाया हे खँय् ल्वापु जुयाः मुम्बईया पश्चिमय् लाःगु कान्डिवाली धाःगु थासय् छम्ह मनुखं थः हे किजायात स्यानाबिउगु दु । लकडाउन यानातःगु कारणं पिहां वने मते धायेक धायेक पिहां वन धकाः २८ दँया राजेशलक्ष्मी ठाकुरं थः किजा दुर्गेशयात स्यानाबिउगु खः । किजा स्याःम्ह राजेशलक्ष्मीयात प्रहरीं ज्वनेधुंकूगु दु ।
ने.सं. ११४० चौलाथ्व २ (चैत १३)
LEAVE YOUR COMMENTS