अमेरिकी चुनाव सर्वेक्षण : ट्रम्प स्वयां बाइडन न्ह्यःने

एजेन्सी – अमेरिकी मतादातातय्सं अमेरिकाया न्हूम्ह राष्ट्रपतिइ डोनाल्ड ट्रम्पयात ल्ययेगु कि जो बाइडनयात ल्ययेगु धकाः थौं मतदात यायेत्यंगु दु । रिपब्लिकन पार्टीपाखें उम्मेदवार जुयादीम्ह ट्रम्प वर्तमान राष्ट्रपति नं खःसा डेमोक्रेटिकया जो बाइडन बराक ओबामा राष्ट्रपति जुयादीबलय् सन् २००९ निसें २०१७ तक उपराष्ट्रपति जुयादीम्ह खः ।

निम्हेसिया दथुइ तःधंगु प्रतिस्पर्धा जुइगु खनेदयाच्वंगु दु। थुपिं निम्ह मध्ये सु त्याइ धयागु थीथी सर्वेक्षण नं जुयादीगु दु । अमेरिकाय् मतसर्वेक्षणय्न्ह्यः ने लाःम्ह हे त्याइ धयागु मदु। गथे सन् २०१६ य् हिलारी क्लिन्टन मतसर्वेक्षणय् न्ह्यःने लानाच्वंगु जक मखु, थः प्रतिस्पर्धी ट्रम्पयात स्व्यां ३० लाख मत अप्वः नं वःगु खः । तर वय्कः पराजित जुल, छाय्धाःसां अमेरिकाय् इलेक्ट्रोल कलेज प्रणालीपाखें विजय घोषित जुइ ।

आःया मतसर्वेक्षणय् नं ट्रम्प स्वयां जो बाइडन हे न्ह्यःने लानाच्वंगु दु। बिबिसीया सर्वेक्षण कथं थुगुसी धाःसा जो बाइडन स्पष्ट रुपं १० प्रतिशतं न्ह्यःने लानाच्वंगु दु। सन् २०१६ पाखे धाःसा ट्रम्प व क्लिन्टन दथुइ निर्वाचन न्ह्यःन मुक्कं २ प्रतिशत जक न्ह्यःने खनेदुगु खः । अमेरिकाय् राज्यया जनसंख्याया आधारय् इलेक्टरल कलेजया मत बियातःगु दु । थ्व प्रणाली अन्तर्गत ५३८ मत दइसा राष्ट्रपतिइ त्याकीम्ह उम्मेदवारं २७० इलेक्टरल मत कायेमाः ।

थौंकन्हय् अप्वः इलक्टरल मत दुगु ‘ब्यालट ग्राउण्ड’ धाइगु राज्यय् नं बाइडन हे न्ह्यःने खनेदयाच्वंगु दु । सर्वेक्षण कथं मिसिगन, पेन्सलभेनिया व विस्कन्सन थेंज्याःगु राज्यय् नं बाइडनं हे न्ह्यःने लानाच्वंगु दु । वंगु निर्वाचनय् ट्रम्प थन १ प्रतिशत स्वयां म्हो जक मतान्तरं त्याःगु खः । न्हापाया चुनावय् ट्रम्प तःधंगु मतान्तरं त्याःगु ब्याटलग्राण्ड राज्यय् नं आः निम्हं उम्मेदवारतय् स्थिति बराबर धयाथें खनेदयाच्वंगु दु। उबलय् आइअवा, ओहायो व टेक्सासय् ट्रम्प १० प्रतिशत मतान्तरं त्याःगु खःसा थ्व पालय् धाःसा बाइडनया बराबरीया टक्कर बियाच्वंगु दु ।

थौंकन्हय् राष्ट्रपति ट्रम्पयात दकलय् हीमी चायेकाच्वंगु कोरोना भाइरसं हे खः । वंगु मार्चय् ट्रम्पं कोरोना महामारी नियन्त्रणया निंतिं ५० अर्ब डलर बजेट बिइवं वय्कःया लोकप्रियता तसकं थहां वंगु खः, तर लिपा कोरोनायात कयाः वय्कःया धापू, वय्कःया ज्याया कारणं आमजनता जक मखु, रिपब्लिकनत हे तंचायाच्वंगु दु ।